3,5 млрд теңге алимент өндірілді.

Алматы облысында прокуратура органдары сегіз ай ішінде 3,5 млрд теңге көлемінде алименттік берешекті өндіріп алды. Бұл туралы облыстық прокуратураның баспасөз қызметі хабарлады.

Ведомство дерегінше, ҚР Қылмыстық кодексінің 139-бабы (балаларды асырауға арналған қаражатты төлеуден жалтару) бойынша 50 борышкер қылмыстық жауапкершілікке тартылған. Оның ішінде 33 адам сотталып, 17 іс берешекті ерікті түрде өтеуіне байланысты тоқтатылған.

Мәселен, аудандық сот борышкер "А"-ны 2,1 млн теңге алимент қарызы үшін бір жылға бостандығын шектеуге үкім шығарған. Ол екі жылдан астам уақыт бойы баласын асырау жөніндегі міндетін орындамаған.

Оқи отырыңыз: Түркістан облысында 30 жастағы жігіт соққыдан көз жұмды: туыстары тергеуге наразы

Сонымен қатар, алимент төлемегендерден төрт жылжымайтын мүлік тәркіленген. Мысалы, 5 млн теңге берешегі бар борышкер "И"-дің орнына сот орындаушысы Еңбекшіқазақ ауданындағы 100 шаршы метр тұрғын үйді өндіріп алған.

"Прокуратураның бастамасымен 169 борышкер әкімшілік жауапкершілікке тартылды. Оның 108-і 5 тәулікке дейін қамауға алынды. Мұндай шаралар ата-аналық міндеттемелерін қасақана орындамай жүргендер үшін айқын тәжірибе болып отыр", – деп атап өтті прокуратура.

Ведомство алименттік міндеттемелердің әлеуметтік маңызы зор екенін және оларды орындаудан жалтарған әрбір жағдай заң аясында қатаң жауапкершілікке әкелетінін еске салды.