Ал біздің ел су ресурстарының ұлттық ақпараттық жүйесін әзірлеп жатыр. Сол арқылы гидро-нысандардың жай-күйін бақылау және талдау жұмыстары оңтайландырылАды. Жауапты министрліктің мәліметі бойынша 2030 жылға қарай су инфрақұрылымының кемінде 40 пайызын цифрлық жабдықтармен қамту көзделіп отыр.

Еркебұлан Смадияров, тілші

Алдымен ауызсу мәселесіне тоқталайық. Өңірлерде инженерлік желілерге қашықтан басқарылатын құрылғылар орнатыла бастады. Олар судың қысымын реттеп отырады және техникалық ақауларды бірден анықтайды. Соның нәтижесінде Шымкент қаласының өзінде ауызсу шығыны жылдағыдан 72 пайызға азайған. Бұған қоса биыл алғаш рет ескі құбырларға бейнекамера жүйесі арқылы талдау жүргізілді.

Арман Болатбеков, Су ресурстары кәсіпорнының бөлім басшысы

Шымкент қаласын білесіздер, тегіс емес жері, ойлы-қырлы. Сондықтан қысым реттегіштерді пайдаландық. Ол 24 сағат қысымды бірқалыпты ұстап тұрады. Соның арқасында қазір су шығындары азайды. Апат болған жағдайда дер кезінде анықтауға қол жеткіздік. Байқасаңыздар, қазір бұрынғыдай қалада су жетпей қалу деген нәрсе жоқ.

Су ресурстарының ұлттық ақпараттық жүйесі келер жылы іске қосылады

Онда тиісті талдау мен болжам жасау үшін мәліметтер енгізіліп, мемлекеттік деректер базасымен интеграция жасалады. Мамандардың айтуынша, жоба Еуразиялық даму банкінің Цифрлық бастамалар қоры есебінен қаржыландырылады.

Қайратғали Хайрулла, Су ресурстары ақпараттық-талдау орталығы КЕ АҚ Басқарма төрағасы

Бұл жалпы Қазақстан бойынша су қорын анықтау, әрбір бассейн бойынша ақпарат алып отыру. Ұлттық жүйеге келіп түскен ақпараттарды біз тасқынға бере аламыз. Бұл оннан артық модульден тұрады. Барлық су пайдаланушылар рұқсат алады және соған есебін беріп отыратын жалпы жүйе.

Қазақстанда 300-ден астам су қоймасы, 3,5 мыңдай магистралдық және шаруашылықаралық канал бар. 2030 жылға қарай гидронысандардың кемінде 40 пайызын цифрлық жүйемен қамту міндеті тұр. Соның аясында келер жылы 103 канал жаңғыртылады.

Аслан Әбдірайымов, ҚР Су ресурстары және ирригация вице-министрі

Сонымен қатар 264 каналды автоматтандыру бойынша жобалық-сметалық құжаттама әзірленіп жатыр. Бұл жұмыстарды 2028 жылға дейін аяқтау жоспарлануда. Қазір нарықта отандық және шетелдік автоматтандырылған қақпа өндіруші компаниялар ұсынылып отыр.

Сондай-ақ шарт жасасу және есеп айырысу процестерін автоматтандыруға арналған Биллинг жүйесі әзірленіп жатыр. Бұл платформада "Қазсушар" кәсіпорны мен фермерлер төлемдерді екінші деңгейлі банктердің мобильді қосымшасы арқылы жүргізе алатын электрондық келісімшарт жасайды.

Еркебұлан Смадияров, 24kz