Қытайдың Шэньчжэнь қаласында Қазақстан теннисшілері тарихи жетістікке бір қадам қалғанда сүрінді.

Билли Джин Кинг кубогының ширек финалында біздің қыздар АҚШ құрамасына қарсы бар күшін салды. Шешуші тартыс жұптық кездесуде өрбіді. Кортқа шыққан Елена Рыбакина мен Юлия Путинцева жанкүйер үмітін ақтау үшін аянбай тер төкті.

Бастапқы партияда қос брейкке қол жеткізген америкалық дуэт басымдылық танытты – 6:2.

Екінші сетте қазақстандықтар 4:1 есебімен алға кеткенімен, Таунсенд – Пегула таразы басын теңестірді – 4:4. Тай-брейкте америкалықтар күш алып кетті – 7:6 (7:1).

Осылайша, Қазақстан құрамасы командалық әлем чемпионатында 18 рет жеңімпаз атанған АҚШ-қа 1:2 есебімен есе жіберді.

Жартылай финалда АҚШ Жапония – Ұлыбритания кездесуінің жеңімпазымен ойнайды. Екінші жартылай финал жұбы – Италия – Украина.