Павлодар облысында 17 тауарлы сүт фермасы бар, деп хабарлайды 24KZ. Биыл тағы екеуі іске қосылады. Жеке қосалқы шаруашылықтардан сүт жинап, өңдеу зауыттарына жеткізетін кооперативтер тағы бар. Өңірдегі ірі агроқұрылымдар Солтүстік Қазақстан облысының тәжірибесін негізге алды. Мемлекеттік қолдау аясында кәсіпкерлер 2,5%-тік жеңілдетілген несиемен шетелден асыл тұқымды голштин-фриз сиырларын сатып алып жатыр.

Өңірде малды асылдандыруға басымдық беріліп отыр. Тауарлы сүт фермалары заманауи технологияларды енгізіп, өнімділікті арттыруға күш салып жатыр. Жергілікті фермерлер мемлекеттік бағдарлама арқылы кәсібін кеңейтуге мүмкіндік алды.

Қуаныш Темірғалин, тауарлы сүт фермасының басшысы:

- Біз өзіміздің жобамызды мемлекеттің қолдауының арқасында жүзеге асырып отырмыз. Солтүстік Қазақстан облысының тәжірибесін негізге алған соңғы бағдарлама аясында 2,5%-пен берілген несиеге 200 бас асыл тұқымды мал сатып алдық. 2023 жылы да Венгриядан мал сатып алған едік. Мемлекеттің қолдауынысыз біз мұндай кәсіпорын құра алмас едік.

Бұл серіктестікте асылтұқымды сауын сиыр саны 1,5 мыңнан асады. Жыл сайын 4 миллион литр сүт сауылады. Кәсіпорын заманауи үлгіде салынған, өндіріс толығымен автоматтандырылған. Ал Ақсу қаласының ауылдық аймағындағы тағы бір тауарлы сүт фермасы 1892 басқа арналып салынған.

Виталий Михайлов, тауарлы сүт фермасы басшысының көмекшісі:

- Біз бұрын мұндай жобаларды жүзеге асыра алмадық. Соның салдарынан жалғыз біздің облыста ғана емес, бүкіл Қазақстан бойынша сүт пен сүт өнімдерінің тапшылығы туындағаны жасырын емес. Мемлекеттік қолдаудың арқасында біз ауқымды өндірістерді іске қостық. Қазір облыс бойынша көптеген ірі шаруашылық құрылып, табысты жұмыс істеп жатыр. Шикізат тапшылығы азайды.

Аталған тауарлы сүт фермасы шетелден 570 бас сауын сиыр сатып алған. Жоспарға сәйкес жоба толық іске қосылса, тәулігіне 50-55 тонна сүт өндіреді. Мемлекеттік көмекті тиімді пайдаланған шаруашылықтар мал басын арттырып, өнім көлемін ұлғайтты.

Әли Әкімжанов, ҚР АШМ Микрокредиттің берілуін мониторингтеу басқармасының басшысы:

- Павлодар облысында жалпы 2023 жылы аталған бағдарлама аясында алты тауарлы сүт фермасы осындай өзінің қаражатын алған болатын, несиелендірілген болатын. Оның ішінде 300 миллионнан бастап 5 миллиардқа дейінгі қаржыландырылған тауарлы сүт фермалары бар. Олардың қазіргі уақытта мына төртеуі іске қосылды. Екеуі жылдың аяғына дейін іске қосылады деп күтіліп отыр. Жаңағы қаржыландырылған алты тауарлы сүт фермалары тек қана кеңейтуге бағытталмаған. Жаңадан құрылған сүт фермаларын көруге болады.

Жалпы Павлодар облысы бойынша сүт бағытындағы мал шаруашылығымен жеті аудан айналысады. Сүт кластерін дамыту агроөнеркәсіп кешенінің басым бағытына айналған. Бұл өз кезегінде өңдеу саласының мүмкіндігін кеңейтіп, экспорттық әлеуетті арттыруға жол ашады.

Авторлары: Қарлығаш Қасиетова, Дәулет Қошқарбаев, Марат Игіліков