Еуропалық одақ 2 500-ден астам ресейлік жеке және заңды тұлғаға қатысты санкцияларды тағы жарты жылға ұзарту туралы шешім қабылдады, деп хабарлайды inbusiness.kz сайты Anadolu Ajansı басылымына сілтеме жасап.

Бұл туралы Еуропалық одақтың сыртқы істер жөніндегі жоғары өкілі Кая Каллас әлеуметтік желіде мәлімдеді.

Санкцияларды ұзарту туралы шешім жұма күні Брюссельде елшілердің кездесуінде олардың қолданылу мерзімі 15 қыркүйекте аяқталуына аз уақыт қалғанда қабылданды.

Каллас сондай-ақ Еуропалық одақ Ресейге қарсы 19-шы жаңа санкциялар пакетін әзірлеуді аяқтап жатқанын айтты. Оның сөзінше, Брюссель ресейлік мұнайдың сатылуына қосымша шектеулер енгізу, "көлеңкелі мұнай танкерлері мен банктерін" бақылауға алу мүмкіндіктерін қарастыруда.