Абай облысында 86 инвестициялық жоба жүзеге асырылуда.

Жыл соңына дейін 10 жобаны іске қосу жоспарланып отыр, оның ішінде чип шығаратын зауыт бар. Бұл жұмыстардың барысы бүгін Президент Жолдауын іске асыру мәселелері жөніндегі кеңесте талқыланды.

Жиында өңір басшысы Берік Уәли өңдеу өнеркәсібін, ауыл шаруашылығын, Көлік және логистикалық инфрақұрылымды дамытудың маңыздылығын атап өтті. Ол үшін Абай облысында көлемі 423 млрд теңге болатын инвестициялық пул жасақталды. Алдағы жылдары өңірде Аягөз-Бақты темір жолы, мыс балқыту зауыты, тау-кен байыту комбинаты және тағы бірнеше кәсіпорын салынады.

Берік Уәли, Абай облысының әкімі:

- Мемлекет басшысы Жолдауда әкімдердің аймақтағы инвестициялық ахуалға тікелей жауапкершілігін белгілеу керек деді. Бұл қала және аудан әкімдеріне тікелей қатысы бар тапсырма дер едім. Біз бұған дейін де осы инвестиция тарту бойынша аудан, қала әкімдеріне бірнеше мәрте осы бағытта жиналыс өткізіп, алдағы уақытта аудан, қала әкімдерінің рейтингісіне осы инвестиция тарту бойынша көрсеткіш енгізілетінін айтқан болатынбыз.

Кеңесте цифрландыруды дамыту да талқыланды. Сала басшыларына ауыл шаруашылығына, білімге және су ресурстарын басқару жүйесіне жасанды интеллектті белсенді енгізу тапсырылды.

Абзал Серікұлы, Абай облысы Цифрлық технологиялар басқармасының басшысы:

- Жасанды интеллект және цифрлық технологияларды дамыту бойынша Абай облысында жұмыстар атқарылып жатыр. Үш жылға деген алдымызға жоспар дайындап жатырмыз. Барлық салаға жасанды интеллект енгізіп, еліміздің цифрлық өркендеуіне үлес қосамыз.

Жасанды интеллект ауруханаларда да қолданылады. Оның көмегімен дәрігерлер электронды денсаулық паспортын жасайды, кей жағдайда диагноз қойып, ем-дом тағайындайды.

Авторлары: Достық Талғатұлы, Медет Өмірханов