Мәжіліс депутаты Сергей Пономарев президенттің 2027 жылы референдум өткізу бастамасына пікір білдірді. Ол саяси жүйені қайта құру елдің демократиялық дамуында маңызды қадам болатынын атап өтті, деп хабарлайды Skifnews.kz ақпарат порталы.

Пономаревтың айтуынша, қазіргі таңда Қазақстанда алты партия жұмыс істеп тұр, сонымен қатар жаңа саяси күштер қалыптасып келеді.

«Бұл – үлкен әрі жақсы перспектива. 2018 жылдан бері айтылып келе жатқан ұсыныс енді ашық жарияланып отыр. Бұл бізге алдын ала дайындалып, дұрыс шешім қабылдауға мүмкіндік береді», – деді депутат.

Сонымен бірге ол парламенттегі партиялардың саны артуы мүмкін екенін айтты. Мәселен, Еуропарламент үлгісіндей экологиялық бағыттағы «жасыл партияның» құрылуы ықтимал. Пономарев әріптестерінің де ұсынысқа оң көзқарас танытқанын жеткізді.

«Бұл жолы мәселе жабық есік жағдайында емес, қоғамның талқысына шығарылып отыр. Президенттің осылайша ашықтыққа мән беруі құптарлық қадам», – деді ол.

Депутат алматылықтарды да белсендірек болуға шақырды.

«Біздің аймақтың тұрғындары сайлауға селқос қарайды. Ал бұл – Қазақстан үшін шешуші қадам», – деп түйіндеді ол.