Мәжіліс депутаты Еділ Жаңбыршин бір палаталы Парламентке көшу бастамасын талқылай отырып, депутаттардың жүктемесі тым көп екенін және бұл заң сапасына кері әсер етуі мүмкін екенін айтты, деп хабарлайды Skifnews.kz ақпарат порталы.

Оның сөзінше, қазіргі құрылымда әр депутат кейде бірден үш заң жобасын қатар алып жүруге мәжбүр.

«Менің кабинетімде бар-жоғы 11 адам. Заң көп, кейде бір депутат үш заңды қатар жүргізеді. Заң сапалы болуы үшін не уақыт, не қосымша адамдар қажет», – деді Жаңбыршин.

Ол оптималды құрамда Парламентте 200-ге жуық депутат болуы тиіс екенін атап өтті (қазір – 150: 98-і Мәжілісте, 50-і Сенатта). Сонымен қатар қоғам сұранысына сай комитеттер санын көбейту қажеттігін ұсынды.

«Кейде өзімізге ChatGPT қолдануға тура келеді»

Депутат көмекшілердің де жұмысқа үлгере алмай жатқанын ашық айтты.

«Көмекшілеріміз азаматтарды қабылдау, хат алмасу, ұйымдастырушылық шаруалардың өзінен үлгере алмайды. Ал заң жобаларын талдауға уақыт жетпей қалады. Кейде өзіміз отырып, ChatGPT қолдануға тура келеді», – деді ол.

Жаңбыршиннің айтуынша, Қазақстанда бір депутатқа тек бір ғана көмекші беріледі. Ал мысалы, Оңтүстік Кореяда әрбір депутаттың жеке офисі бар, онда бірнеше кеңесші мен көмекші қызмет атқарады.

«Ғимарат емес, сапалы депутат керек»

Сонымен қатар депутат Парламент ғимаратын ауыстыру мәселесін бірінші кезектегі міндет деп есептемейтінін жеткізді.

«Астанада ғимарат жетеді. Ең бастысы – сапалы депутаттар жинап, құрылымды дұрыс құру», – деді Жаңбыршин.

Цифрландыру мен инвестицияға жеке комитет қажет

Ол Президенттің цифрландыру мен жасанды интеллект жайлы Жолдауына тоқталып, осы салалар бойынша арнайы комитет жоқ екенін сынға алды.

«Президент бүгін цифрландыру мен жасанды интеллект туралы көп айтты. Бірақ бізде оған жауапты комитет жоқ. Инвестициялар да дәл солай. Сондықтан бір палаталы Парламент құрылымын қайта қарау қажет», – деді депутат.