Алматы облысында жанжал адам өлімімен және бала ұрлауымен аяқталды.

Алматы облысының Талғар қаласында ер адам оққа ұшып, екі жасар қыз бала ұрланды. Бұл туралы облыстық полиция департаменті мәлімдеді.

Оқиға куәгерлерінің айтуынша, күдікті мен жәбірленуші әйел, яғни, баланың анасы бұрын жақын қарым-қатынаста болған. Алайда олардың арасында жанжал шығып, соның салдарынан күдікті жігіт әйелдің ағасын мылтықпен атып өлтірген. Қанды қылмыстан кейін ол әйелдің кішкентай қызын (2019 жылы туған) күштеп алып кеткен.

Ер адамды өлтіру және кәмелетке толмаған баланы ұрлау фактілері бойынша қылмыстық істер қозғалды. Артынша күдікті ұсталып, уақытша ұстау изоляторына қамалды.

Дәрігерлер зардап шеккен кішкентай қызға ота жасап, тіліне сегіз тігіс салды. Адвокат Гаухар Сариеваның айтуынша, қылмыскер көлікте отырған баланы жардан құлатқан. Сол сәтте қыз түрлі жарақаттар алып, тілін зақымдап алған.

Оқи отырыңыз: Талғарда қайғылы жағдай: тауға демалуға барған 10 жастағы бала мен анасы өзенге ағып кетті

Адвокаттың мәліметінше, қыздың анасы медбике болып қызмет атқарады. Қайғылы сәтте ол көршісіне барып, көк тамырына ине салуға көмектесіп жүрген.

"Егер қыздың анасы үйде болған жағдайда оқиға қалай өрбитінін елестете алмаймын", – деді Сариева.