Еңбек, Ғылым және жоғары білім, Оқу-ағарту, Өнеркәсіп және құрылыс, Туризм министрлігінің және ЦДИАӨМ білім беру, халықты әлеуметтік қорғау, тұрғын үй қатынастары салаларындағы мемлекеттік қызметтер көрсету жөніндегі пилоттық жобаны іске қосу туралы бірлескен бұйрығына қол қойылды.

Атап айтқанда, пилоттық жоба келесі мемлекеттік қызметтерді көрсетуді қамтиды:

• "Жоғары және (немесе) жоғары оқу орнынан кейінгі білім беру ұйымдарында білім алушыларға жатақхана беру";
• "Жоғары білім беру ұйымдарында білім алатын және тәрбиеленетін жекелеген санаттағы азаматтарға, сондай-ақ қорғаншылықтағы (қамқоршылықтағы) және патронаттағы адамдарға тегін тамақтандыруды ұсыну";
• "Мүгедектігі бар балаларды үйде оқытуға жұмсалған шығындарды өтеу";
• "Жалпы білім беретін мектептердегі білім алушылар мен тәрбиеленушілердің жекелеген санаттарын тегін және жеңілдікпен тамақтандыруды ұсыну";
• "Мемлекеттік білім беру мекемелеріндегі білім алушылар мен тәрбиеленушілердің жекелеген санаттарына қала сыртындағы және мектеп жанындағы лагерьлерде демалуы үшін құжаттар қабылдау және жолдама беру";
• "Білім беру ұйымдарының білім алушылары мен тәрбиеленушілеріне қаржылық және материалдық көмек көрсету";
• "Техникалық және кәсіптік, орта білімнен кейінгі білім беру ұйымдарында білім алушыларға жатақхана беру";
• "Техникалық және кәсіптік, орта білімнен кейінгі білім беру ұйымдарындағы тәрбиеленушілер мен білім алушылардың жекелеген санаттағы азаматтарына, сондай-ақ, қорғаншылық (қамқоршылықтағы) пен патронаттағы тұлғаларына тегін тамақтандыруды ұсыну";
• "Жеке тұрғын үй қорынан жалға алынған тұрғынжай үшін жалдау ақысының бір бөлігін субсидиялау";
• "Тұрғын үй көмегін тағайындау";
• «Спортшылар мен жаттықтырушыларға өмір бойы ай сайынғы материалдық қамсыздандыруды төлеу» мемлекеттік көрсетілетін қызметтерін және (немесе) қызметті көрсету бойынша пилоттық жоба жүзеге асырылсын.

Аталған мемлекеттік қызметтер ҚР Еңбек және халықты әлеуметтік қорғау министрлігінің цифрлық платформасында көрсетіледі.

Сондай-ақ, Шымкент қаласы мен Қарағанды облысында іске қосылған пилоттық жобаны іске асыру кезінде мемлекеттік органдардың өзара іс-қимыл алгоритмі бекітілді.

Бірлескен бұйрық 2025 жылғы 23 мамырдан бастап қолданысқа енгізіледі және бір жыл бойы қолданылады.