«Қазақстан халқына» қорының басқарма төрайымы Ләззат Шыңғысбаева Қызылордадағы іс-шараға барған кезде киген қымбат киімі қоғамда үлкен пікірталас тудырды. Әлеуметтік желі қолданушылары оның Miu Miu маркалы пиджагы шамамен 2,4 миллион теңге, ал Fendi брендінің шалбары 1 миллион теңге тұратынын анықтап, наразы болды, деп хабарлайды Skifnews.kz ақпарат порталы.

Бұл жағдай әсіресе сирек ауруға шалдыққан балалардың ата-аналары арасында қызу талқыланды. Олардың айтуынша, қор 2022 жылдан бері тіркелмеген қымбат дәрілерді сатып алуға көмектесіп келген. Алайда биыл мамыр айында қаржы тапшылығына байланысты бұл қолдау тоқтатылып, қаражат басқа жобаларға бағытталғаны хабарланған.

Дюшенн бұлшықет дистрофиясымен ауыратын балалардың ата-аналары бірнеше рет қор басшылығымен кездесуге тырысқан. Арнайы Астанаға барған күндері оларды ешкім қабылдамаған. Кейін Шыңғысбаеваның Қызылордадағы шарада қымбат бренд киіммен жүрген суретін көріп, ашу-ызаға булыққан.

«Сыртқы көрінісінің өзі осындай болса, жалақысы қандай екен деген сұрақ туады. Балалардың еміне ақша жетпей жатқанда, қымбат киім кию қаншалықты орынды?» – дейді «Өмірге сен» қорының жетекшісі Сабиля Шүгелова.

Алайда «Қазақстан халқына» қорының өкілі бұл сынға жауап беріп, Шыңғысбаеваның киімі түпнұсқа емес, Түркияда тігілген көшірме екенін айтты.