Бектұровтың айтуынша шетелдік инвесторлар мен қазақстандық кәсіпкерлердің ортақ диалог алаңын қалыптастыру маңызды.

«Негізінен біздің инвесторларымыз шетелдік, біз негізінен оларды тартамыз, әрине, жергілікті инвесторларымыз да бар, біздің кәсіпкерлердің көптеген идеялары мен таланттары бар, сондықтан олардың кездесіп, ойларымен алмасып, инвесторға не қажет екенін, ал біздің кәсіпкерлер нақты не ұсына алатынын білуіне мүмкіндік жасауымыз керек. Сол себепті мұндай форумдар өте маңызды», дейді ол.

Сонымен қатар шетелде таныстырумен қатар, Қазақстанның әлеуетін көзбен көрсету бөлек нәрсе.

«Жүз рет естігенше, бір рет көрген артық» дейді ғой. Біз шетелге барып, Қазақстан туралы, АХҚО туралы айтқанда олар тек естиді. Бірақ олар келгенде, шын мәнінде, Астана қандай қала екенін, оның архитектурасын, дамуын, құрылыс қарқынын көргенде, елдің қарқынды дамып жатқанын сезінеді. Үлкен саясаткерлеріміздің еліміздің ашықтығы мен инвестициялық жобалары туралы әңгімесін тыңдағанда, көптеген бастамаларды көргенде, инвестор Қазақстанға келіп: «Мен де тәуекелдерге ортақтасып, өз қаржыммен сіздермен бірге жобаларға салым жасауға дайынмын» десе бұл мүлдем басқа әңгіме. Сондықтан мұндай форумдар біздің экономикамыз үшін де, тәуекелдерді бөлісу үшін де өте маңызды деп есептеймін», дейді АХҚО басқарушысы.

Ринат Бектұров форумның ең басты оқиғалары мен жаңалықтары ретінде үшеуіне айырықша тоқталды. Оның ішінде ең бастысы — GXIN компаниясының қосарлы IPO-сы Гонконг және біздің биржада қатарынан болды. Компания Алматы облысындағы вольфрам кен орындарын игерумен айналысады. Олар бастапқыда 150 миллион доллар тартуды жоспарлаған, бірақ 170 миллион доллар тартты. Қаражаттың басым бөлігі Алматы облысындағы вольфрам өндірісін дамытуға бағытталмақ.

«Екінші үлкен жаңалық — тек Қазақстанның ірі компаниялары ғана емес, өңірлер де инвестиция тарта алатынын көрсетті. Мәселен, «Ақтөбе» ӘКК 100 миллион теңге көлемінде алғашқы әлеуметтік облигацияларын шығарды. Бұл бағыттағы алғашқы қадам, қаражат облыстағы әлеуметтік нысандарға инвестициялауға жұмсалмақ.

Және тағы бір жаңалық — егер бұған дейін бізде споттық биткойнға арналған ETF листингтелсе, енді әлемде тұңғыш рет Solana-ға арналған ETF шығарылады. Бұл да өте танымал криптовалюталардың бірі, яғни енді инвесторлар тікелей осы валютаға инвестиция жасай алады», дейді Ринат Бектұров.

Айта кетейік, Astana Finance Days аясында Түркі мемлекеттері ұйымының «жасыл кеңесін» өткізу жоспарланған.