2025 жылғы 23 мамырда "Нұр Жолы" (ҚР) – "Қорғас" (ҚХР) өткізу пункттерінде Қазақстан мен Қытай делегацияларының бірлескен жұмыс сапары өтті. Бұл жайлы бүгін, 26 мамырда Мемлекеттік кірістер комитеті мәлімдеді, деп хабарлайды Zakon.kz.

Сапар аясында келесі нақты шешімдер қабылданып, уағдаластықтар жасалды:

• "Нұр Жолы" – "Қорғас" өткізу пункттерінің тәулік бойы жұмыс істеу режимін 2026 жылғы 30 маусымға дейін ұзарту;
• Қытай тарапының Қазақстаннан келетін автокөлік құралдарын қабылдау көлемін ұлғайту:

- "Нұр Жолы" өткізу пункті арқылы – қазіргі таңда тәулігіне 650 АТС қабылдануда, 1 шілдеден бастап бұл көрсеткіш 750 АТС болады, ал қыркүйек айында – 1000 АТС дейін арттырылады;

- "Қалжат" өткізу пункті арқылы – тәулігіне 130 АТС-тен 250 АТС-ке дейін артты, маусым айында 300 АТС-ке дейін ұлғайтылады;

• 2025 жылғы мамыр айының соңына дейін Қытай тарапының "Дулаты" өткізу пунктінде қосымша мобильді инспекциялық-байқау кешенін (МИДК) іске қосу;
• 2025 жылғы қыркүйектің соңына дейін "Қорғас" өткізу пунктінде тұрақты инспекциялық-байқау кешенін орнату;
• Инспекциялық-байқау кешендерінің рентгендік кескіндерін өзара тану жөнінде келісімге қол жеткізілді, бұл қайталап тексеру уақытын қысқартып, шекарадан өту үдерісін жеделдетеді;
• "Қорғас" ХШСО арқылы тасымал ағындарын оңтайлы бөлу жоспарлануда, бұл "Нұр Жолы" өткізу пунктіндегі жүктемені азайтуға және тасымал қозғалысын теңгерімді бөлуге мүмкіндік береді;
• "Нұр Жолы" – "Қорғас" өткізу пункттерінде қозғалыс жолақтары мен шекаралық көпірді кеңейту мәселесі екі тараппен бірлесіп қаралуда;

Сондай-ақ, шекара маңындағы кеден қызметтері деңгейінде ай сайынғы отырыстар және Қазақстан-Қытай кеден органдарының үйлестірушілерінің тоқсан сайынғы кездесулерін өткізу келісілді.

Бұған дейін Алматы көшелерінің бірі жартылай бір жақты қозғалысқа көшкендігі хабарланған болатын.