Жыл басынан бері шабындықтар мен жеке аулалардағы мал азығы отқа оранды.

Жалпы, Павлодар облысында барлығы 22 оқыс оқиға тіркелді. Соның салдарынан 40 мың шаршы метрден астам аумақтағы шөпті қызыл жалын шарпыды, деп хабарлайды inbusiness.kz тілшісі.

Жергілікті төтенше жағдайлар департаменті мемлекеттік өрт бақылау басқармасы бастығының міндетін атқарушы Берік Омаровтың айтуынша, өрт шабындықтан да, жеке аулалардан да шықты.

"Барлық дерлік төтенше жағдай орын алуының басты себебі – өрт қауіпсіздігі талаптарының сақталмауы. Бұл ретте қызыл жалын салдарынан тек мал азығы емес, ауыл шаруашылығы техникалары да отқа оранды. Әсіресе, қазіргі шөп жинау науқаны кезінде сақ болу аса маңызды. Ауылдық жерлерде қызыл жалын қас қағым сәтте көп аумаққа жайылуы мүмкін. Сондықтан қауіпсіздік шараларын қатаң сақтау қажет", — дейді ол.

Мұндай оқыс жайттардың алдын алу үшін тұрақты түрде рейдтер жүргізіліп тұрады. Соның нәтижесінде 264 жеке және лауазымды тұлға әкімшілік жауапкершілікке тартылып, жалпы сомасы 800 мың теңге айыппұл төледі. Тағы екі адам істен шыққан ауыл шаруашылығы техникасын пайдаланғаны үшін 117 мың теңге айыппұл арқалады.

Жалпы, биыл Павлодар облысында 1 млн 425 мың тоннадан астам шөп жинау жоспарда бар. Бүгінгі күні оның басым бөлігі дайындалып, қыстақтарға тасымалдануда. Сонымен қатар, 1259,7 мың тонна жем-азық әзірлеу міндеті тұр.