4–14 қыркүйек аралығында Англияның Ливерпуль қаласында World Boxing ұйымы өткізетін алғашқы тарихи әлем чемпионаты өтеді.

Жалпыкомандалық есептегі басты фавориттер турнир басталмай тұрып-ақ белгілі. Бұл – Қазақстан мен Өзбекстан құрамалары.

Өзбекстан құрамасынан мықты боксшылардың қатарында Париж Олимпиадасының-2024 чемпиондары Абдумалик Халоков (57 кг) пен Асадхужа Муйдинхужаев бар.

Ал Қазақстан ерлер құрамасының әлем чемпионатына қатысатын құрамы мынадай: Санжар Тәшкенбай (50 кг), Махмұд Сабырхан (55 кг), Бейбарыс Жексен (60 кг), Ертуған Зейнулинов (65 кг), Төрехан Сабырхан (70 кг), Сабыржан Аққалықов (75 кг)

Нұрбек Оралбай (80 кг), Бекзад Нұрдәулетов (85 кг), Сағындық Тоғамбай (90 кг), Айбек Оралбай (90+ кг).

Бейбарыс Жексен мен Ертуған Зейнулиновке Олимпиада чемпиондарына қарсыласу оңай болмайды. Бірақ Ертуғанның өзі беделді Eindhoven Box Cup-2025 жарысында және әсіресе "Странджа" кубогында жарқын өнер көрсеткенін ұмытпау керек.

Қазақстан құрамасының да мықты тұстары жеткілікті. Құрамда – Олимпиаданың күміс жүлдегері, команда көшбасшысы Нұрбек Оралбай, оның бауыры Айбек және ағайынды Сабырхандар бар. Махмұд соңғы уақытта едәуір жақсы өнер көрсетіп жүр. Ал Төрехан үшін бұл ұлттық құрамадағы алғашқы ірі сын. Сондықтан одан үлкен үміт күтеміз.

Айтпақшы, Төреханның ықтимал қарсыласы Шавкатжон Болтаев биылғы жастар арасындағы Азия чемпионатында қазақстандық Аман Қонысбекпен жекпе-жегінде төрешілер дауына іліккен еді. Өте тартысты айқаста жеңісті өзбек боксшысына беріп, қазақстандық тарап ресми қарсылық білдірді. Бұл оқиға үлкен резонанс тудырды. Сол себепті, бұл жағдай Төрехан үшін қосымша жігер берері анық.

Ал Нұрбек Оралбайдың ықтимал қарсыласы өзбек Жавохир Умматалиев әзірге аса үлкен жетістіктерімен танылған жоқ. Ересектер деңгейінде оның ең елеулі табысы – "Странджа" кубогының қола жүлдесі. Сондықтан Нұрбек үшін бұл чемпионатта барын салып, Астанада өткен Әлем кубогындағы күтпеген финалдық жеңілісі үшін реванш алу аса маңызды.

Дәл осындай жағдайды Бекзад Нұрдәулетовке де қатысты деуге болады. 2019 жылғы әлем чемпионының ықтимал қарсыласы Акмалжон Исроилов өте қауіпті боксшы саналады. Ол Польшадағы Әлем кубогында жақсы өнер көрсетті. Дегенмен тәжірибе мен шеберлік жағынан Бекзадтың артықшылығы айқын.

Супер ауыр салмақтағы айқас та айрықша қызығушылық тудырады. Өзбекстан сапынан Баходир Жалоловтың ізбасары саналатын Жахонгир Зокиров шаршы алаңға шығады. Ол – 22 жасқа дейінгі Азияның екі дүркін чемпионы әрі жастар арасындағы әлем чемпионы.

Оның Айбек Оралбаймен ықтимал жекпе-жегі әлем чемпионатының басты оқиғасына айналуы әбден мүмкін. Чемпионат қарсаңындағы сұхбатында Зокиров Өзбекстан құрамасының турнирде барлық 10 алтын медальді алуды мақсат етіп отырғанын мәлімдеді. Дегенмен біздің жігіттер намысты қолдан бермей, әлем чемпионатынан олжалы оралады деп сенеміз.

Айта кетейік, Ливерпульде өтетін әлем чемпионатына Қазақстан әйелдер құрамасы да қатысады.