Өткен жылы көрерменнің ыстық ықыласына бөленіп, талқыдан түспеген «ШЫДА-2» телехикаясының жаңа маусымының тұсаукесері қыркүйектің ортасында НТК арнасында өтеді.

Телевизиялық рейтингі бойынша жоба өз сегментінде көшбасшылардың қатарында болды. Телехикаяның алғашқы бөлімі YouTube-та шамамен 3 миллион қаралым жинап, жалпы көрілім саны 20,7 миллионнан асты, деп хабарлайды Caravan.kz медиа порталы.

Айшаның оқиғасы тек қазақстандық қана ғана емес, Қырғызстан, Өзбекстан және ТМД-ның басқа да елдеріндегі көрерменнің жүрегіне жетті. Көрермендер: «Бұл фильмде елімізде болып жатқан нақты жағдайлар көрсетілген», «жүрегім ауырды, ешкімге бұндайды тілемеймін», «барлық бөлімінде жыладым, өте қайғылы», «мұндай қорлыққа шыдамаңыздар», — деген сынды пікірлер жазып, өз сезімдері мен тәжірибелерімен бөлісті.

Өкінішке қарай, тұрмыстық зорлық-зомбылық қазіргі қоғамдағы ең ауыр әрі жабық тақырыптардың бірі болып қала береді. Әрбір жаңалықтағы кезекті оқиға – жай ғана статистика емес, біреудің өмірі, біреудің қасіреті. Сондықтан да «ШЫДА» телехикаясы жабық есіктің ар жағында қалып қоятын мәселелерді қозғауды жалғастырады.

Премьера қарсаңында біз басты рөлдегі актриса Меруерт Кульсартовамен кездесіп, жобадағы жұмысы жайлы әсерімен бөлісуді сұрадық.

— Меруерт, сізге күрделі драмалық рөл бұйырды. Айшаның оқиғасы сізге қаншалықты жақын? Кейіпкеріңіз сияқты сізге де қайратыңызды қайрайтын кез басыңыздан өтті ме?

— Сценарийді алғаш оқығанда, Айшаның хикаясы мені қатты толқытты. Өмірімде, шүкір, мұндай жағдай болмады, бірақ біз өте маңызды әрі ауыр тақырыпты көтеріп отырғанымызды түсіндім. Бұл рөлді шынайы жеткізу үшін мен абьюзден өткен әйелдердің подкасттары мен сұхбаттарын тыңдап, олардың әңгімесінен бойына сіңірген қайсарлық пен күшті табуға тырыстым. Сол қасиеттер — ішкі тірек, мінездің беріктігі менің образымның негізіне айналды.

— Эмоциялық тұрғыда ең ауыр қай сахна болды?

— Маған ең қиыны маусымның екінші жартысындағы, алтыншы бөлімнен басталатын эпизодтар болды. Сюжет бойынша Айша өткенге оралып, өміріндегі ең ауыр сәттерді қайта бастан кешіреді. Оның кәсібі күйрейді, қаржылық жағдайы бақылаудан шығады. Сол уақытта бұрынғы күйеуі Архат Жандосты арандатып, түрмеге түседі. Оның темір тордың арғы жағындағы өмір желісі маусымдағы ең шиеленісті сәттердің бірі болды. Айша оған тұрақты түрде кездесуге барып, Жандостың жаңа жағдайға бейімделуін көреді. Бұл көріністерде көп көз жасы, үлкен эмоционалды қысым болды. Тіпті түсірілім кезінде көзімде капилляр тамырлар жарылып, бірнеше күн қызарған көзбен жүріп, дәрі қолдануға тура келді. Бірақ мен сенемін, маусымның осы бөлігі көрермендерге ерекше ұнайды. Себебі, онда тереңдік, драматизм және алғашқы маусымға сілтемелер көп.

— Көптеген көрермен үшін Айша қайсарлықтың символына айналды. Ал сіз үшін бұл рөл нені білдіреді?

— Бұл рөл мен үшін визиттік карточка болды. Түрлі эмоциялар мен жағдайларды сезініп үйрендім. Академия түлектері үшін мұндай кейіпкерді ойнау сирек мүмкіндік, мен бұған өте қуаныштымын. Айшаның оқиғасы біреуге бостандыққа қарай алғашқы қадам жасауға шабыт берсе екен деймін.

«ШЫДА 2» – бұл жай ғана телехикаяның жалғасы емес, әділеттің жеңісі мен рух күшінің салтанаты. Өзі үшін күрескен Айша басына түскен ауыртпашылық көптеген әйелге ортақ екенін түсініп, тұрмыстық зорлық-зомбылықтан зардап шеккендерге қолдау көрсету қорын құрады. Баласының із-түзсіз жоғалып, Жандостың түрмеге түсіп, кәсібінің күйреуін бастан өткерген ол әлі де аяғынан тұрып кетуге ғана емес, өзгелерге де көмек қолын созуға күш табады. Айша өзін қайта табады: енді ол құрбан емес, азапты, әділетсіздікті және қирауды жеңе білген, осындай жағдайға тап болғандардың тірегі бола білген мықты әрі тәуелсіз әйел. Айша төзімнің, сенімнің және күрестің символына айналады. Енді ол бұрыңғы Айша емес, ең қиын сынақтардың өзі жаңа өмірдің бастауы бола алатынын дәлелдеген әйел.

Режиссёр және актёрлік құрам: Жоба режиссёры Дәулет Бекмағамбетов «Ана», «3-й интернационал», «Пәленшеевтер», «Қыз қиялы», «Диназаур» сияқты танымал туындылар мен телехикаялардың авторы әрі қоюшы режиссёры. Ол ерекше көрермендік ықыласқа «Әпке» драмасы арқылы ие болды, оған дәлел цифрлық киноқызметтердегі жоғары баға мен рейтинг.

Басты рөлдерде: Меруерт Кульсартова, Қуаныш Бейсағалиев, Ералы Прмағанбет, Қуаныш Құдайберген, Бақытжанқызы Айым, Альмира Искакова, Шахризада Серікова, Еркебұлан Жайсанбек, Жасмин Давлеткан, Самал Нұрбай, Лиза Серікова.

Телехикая НТК арнасының бастамасымен Bas Pro кинокомпаниясы және Қазақстан Республикасының Ақпарат және мәдениет министрлігінің қолдауымен түсірілді. Бұл қоғам назарын маңызды әрі жиі жабулы қалатын мәселелерге аударуға бағытталған бірлескен әлеуметтік-мәдени жоба.

Телехикаяның тұсаукесері 2025 жылдың 15 қыркүйегінде өтеді. Көрерменді ұзақтығы 35 минуттық 12 бөлім күтеді. Әр бөлім драмаға, эмоцияға және күтпеген оқиғаларға толы.