Келесі ШЫҰ саммиті 2026 жылы Бішкекте өтеді.

Ыстықкөл жағалауында орналасқан Чолпон-Ата қаласына ШЫҰ-ның 2025-2026 жылдардағы туризм және мәдени астанасы деген мәртебе берілді, деп хабарлайды inbusiness.kz сайты.

Қырғызстан ШЫҰ-ға төрағалығы аясында басымдықтарды таныстырды

Қырғызстан президенті Садыр Жапаров Тяньцзиньде өткен ШЫҰ мемлекет басшылары кеңесінде елдің ұйымға төрағалығы кезеңіне арналған негізгі жоспарларын жариялады.

Жапаровтың айтуынша, Қырғызстанның төрағалығы "ШЫҰ-на 25 жыл: тұрақты әлем, даму мен гүлденуге бірге" ұранымен өтеді. Ол келесі бағыттарға басымдық берілетінін атап өтті:

Қауіпсіздік: терроризм, сепаратизм және экстремизмге қарсы күрес жалғасып, Бішкекте трансұлттық ұйымдасқан қылмысқа қарсы күрес орталығы құрылады.

Экономика: ШЫҰ Даму банкі, Даму қоры және Инвестициялық қор құру ұсынылды.

Көлік және логистика: жаңа халықаралық көлік бағыттарын ашып, мүше елдердің транзиттік әлеуетін толық пайдалану көзделуде.

Цифрландыру: жастардың цифрлық форумы ұйымдастырылып, ортақ цифрлық трансформация жобаларына қолдау көрсетіледі.

Климат және жасыл экономика: климаттың өзгеруіне қарсы шараларды күшейтіп, "жасыл" жобаларды ілгерілету жоспарда бар.

Сондай-ақ, төрағалық аясында Ыстықкөлде "интеллектуалдық" форум өтеді және Дүниежүзілік көшпенділер ойындары ұйымдастырылады.