Бұл ақпаратты әуе компаниясының баспасөз қызметі растады.

Алматыдан Ақтауға шыққан Air Astana ұшағы шұғыл қонуға мәжбүр болды, деп жазады inbusiness.kz сайты.

Әлеуметтік желіде тараған видеода жолаушылар ұшақ әуеге көтерілген сәтте борттан бөгде шу шыққанын айтқан. Шамамен 30-40 минуттан кейін әуе кемесі төмендей бастаған.

– 31 тамызда Алматы-Ақтау бағытындағы КС 859 рейсінің экипажы Ақтауға жетер тұста техникалық ақау туралы хабарлап, нұсқаулыққа сәйкес бірінші болып қонуға рұқсат сұрады. Кейін ұшақ қауіпсіз эшелонның көмегімен әуежайға аман-есен қонды, – деп мәлімдеді Air Astana өкілдері.

Қазір ақаудың себебі тексеріліп жатыр. Барлық жолаушылар басқа әуе кемесіне ауыстырылған.

– Адамдар дұға оқып, әйелдер жылады. Стюардессалардың да жүздерінен қорқыныш сезілді. Бір сәтте борттан "далаға шұғыл қонуға тура келеді" деген хабар айтылды. Ал стюардессаның даусы дірілдеп, үрейге толы болды, – деді жолаушылардың бірі.