Білім беру ғимараты екі айға жетер-жетпес уақытта бой көтерді.

Жыл басында Павлодар облысы Бұланбай ауылындағы негізгі мектеп отқа оранып, толығымен жанып, қайта қалпына келтіруге келмей, күлге айналған еді, деп хабарлайды inbusiness.kz тілшісі.

Ертіс ауданындағы білім беру мекемесі 2010 жылы салынған болатын. Осы уақыт аралығында негізгі мектеп оқушылары замануи талапқа сай оқу орнында білім алып келді. Алайда 23 қаңтар күні мектеп жанындағы баған отқа оранып, қатты желдің салдарынан өрт білім мекемесіне "көшіп", аз уақыт аралығында қызыл жалын шамамен 150 шаршы метр болатын ғимаратты толығымен шарпыды. Абырой болғанда, бұл күні аяздың салдарынан оқушылар қашықтан оқу режиміне ауыстырылып, мектепте балалар да, мұғалімдер де болған жоқ.

Оқыс оқиғадан соң 20 оқушы уақытша шағын орталыққа орналастырылған еді. Бірнеше күн дересінде бұл орталықта оқу кабинеттері мен жиһаздары дайындалып, балалардың ас ішуіне арналған бөлме жабдықталды. Сөйтіп, оқу жылын да аяқтады.

Ал шілде айында мердігер компания бір қабатты жаңа ғимараттың құрылысына кірісті. Небары екі айдың ішінде жалпы аумағы 241,1 шаршы метр болатын жаңа мектеп салып берді. Мұнда 6 оқу кабинеті, мектеп жасына дейінгі балаларға арналған мектепалды даярлық тобы, компьютерлік сынып, спорт және мәжіліс залы, асхана бар. Бүгінгі таңда негізгі мектепте барлығы 20 бала білім алады. Атап айтқанда, бастауыш сыныптарда бес, 5-9 сыныптарда 5 шәкірт оқиды.

Ауыл тұрғындары жаңа мектептың салынғанына бек қуанышты екенін білдірді.

"Мектеп өртеніп кеткенде бәріміз ауылдың болашағына алаңдадық. Өйткені, ауылдың болашағы тікелей мектепке байланысты. Біз үшін мектеп — ауылдың жүрегі. Ауылдастар балалары көрші ауылдарға кетуге мәжбүр бола ма деп алаңдады. Әкім жаңа мектеп салуға уәде беріп, сөзінде тұрды. Бүгін балалар жаңа сыныптарға кіріп, көңіліміз жайланды", — дейді көпбалалы ана Бекзат Қымбат.

Оқушылар да заманауи оқу орнында білім алатынына қуанышты екендіктерін жеткізді.

"Бұрын біз ескі ғимаратта, тар сыныптарда оқыдық. Қазір бізде әдемі сыныптар, спорт залы және компьютерлер бар. Бұл жақсы оқуға одан әрі шабыт береді", — деді 9-сынып оқушысы Кәусар Жұмабай.

Мектептің салтанатты ашылуына Павлодар облысының әкімі Асайын Байханов қатысты, ауыл жұртшылығын айтулы күнмен құттықтады.