Өткен жылы Ақтөбе облысының қазынасына 901 млрд теңге қаржы құйылды.

Жобаларды іске асуы мыңнан астам жұмыс орнын құруға мүмкіндік берді. Облыстың әлеуметтік-экономикалық дамуы – өңір басшысы Асхат Шахаровтың қатысуымен өткен облыстық мәслихаттың кезекті ХХ сессиясында сөз болды.

Былтырғы жылдың қорытындысына сәйкес, өңір экономикасының өсімі 106,4% құрады. Өнеркәсіп, құрылыс, саудада оң динамика байқалған. Инвестиция да артыпты. Жыл басынан бері өңір 590 млрд теңге тартып, бюджет бүйірін толтырды. Облыста агрохимикаттар шығаратын зауыт пайдалануға берілді, жақын күндері жүн өңдеу зауыты және жел электр станциясы халық игілігіне беріледі.

Асхат Шахаров, Ақтөбе облысының әкімі:

- Биыл 440 млрд теңгеге 10 инвестициялық жобаны жүзеге асыру жоспарлануда. 2 жобаны толық біз аяқтадық. Қалған 8 жобаны жылдың соңына дейін аяқталатын болады. Тек ғана облыстық деңгейде емес, аудан әкімдерінің өзі Қытай мемлекетіне барып, келіссөздер жүргізіп келеді. Бұл жұмыстарды біз жалғастырамыз.

Инвестициялық жобалармен қатар инфрақұрылымдық жобалар да маңызды. Аймақта "Ақтөбе-Қарабұтақ-Ұлғайсын" республикалық тасжолы қайта жаңартылуда. Бірінші кезеңде 28 шақырым жол жөнделеді. Қалған алты учаске бойынша мердігерлерді анықталып жатыр.

Нұржан Мақсатов, Ақтөбе облысы экономика және бюджеттік жоспарлау басқармасының басшысы:

- Өткен жылы 50 млрд-тан астам қаражат бөлініп, 500 шақырым жол жөнделген болатын. Аталған қанағаттанарлық жағдайдағы жолдардың пайызы 78 пайызды құрады. Биылғы жылы аталған жоспарды 82 пайызға жеткізіп 503 шақырымнан астам жолды жөндеуді жоспарлап отырмыз.

Жыл соңына дейін өңірде ауданы 1 млн шаршы метрді құрайтын тұрғын үй пайдалануға берілмек. Сонымен қатар облыс орталығында заманауи драма театрының құрылысы басталады.

Достық Талғатұлы, Айнадин Молдабеков