26 тамызда алматылық "Қайрат" плей-офф кезеңінің қарымта матчында шотландиялық "Селтикті" өз алаңында жеңіп, Чемпиондар лигасының топтық кезеңіне жолдама алды.

Бұл туралы Caravan.kz медиа порталы хабарлайды.

Жауапты ойында «Қайрат» қақпашысы Темірлан Анарбеков пенальти сериясында Адам Айда, Люк МакКоун және Дайдзен Маэдатың соққыларын қайтарды. Осылайша ол “Қайратты” Чемпиондар лигасының топтық кезеңіне шығарды.

Осы ретте аталмыш ойынның жұлдызы атанған Темірлан Анарбеков туралы не белгілі?

Темірлан Анарбекұлы Анарбеков 2003 жылы, 14 қазанда Атырау қаласында дүниеге келген. Бүгінде алматылық «Қайрат» футбол клубының және Қазақстан ұлттық құрамасының ойыншысы.

Темірлан футболға бала кезінен әуестеніп, алғашқы жаттығуларын туған жеріндегі “Атырау” командасының жасөспірімдер құрамында бастады. 2017 жылы еліміздің атақты клубтарының бірі саналатын “Қайраттың” академиясына қабылданып, дәл осы жерде кәсіби ойыншы ретінде шыңдалды.

Ал, кәсіби мансабын 2020 жылы “Қайрат” сапында бастады. Алғаш рет алаңға сол жылы 30 қарашада, Қазақстан Премьер-лигасында “Таразға” қарсы ойында шықты. Аталмыш кездесуде ол 46-минутта Дінмұхаммед Жомарттың орнына ойынға қосылды.

Темірлан Қазақстан жастар құрамасында да ойнаған. Ол 2021 жылдың 6 қазанында U-19 құрамасы сапында Чехияға қарсы кездесуде алғашқы ойынын өткізді.

2025 жылдан бері ол Қазақстан құрамасының сапына қосылып, маңызды халықаралық ойындарда ел намысын жүр.

Темірлан 2020 жылы “Қайратпен” бірге Қазақстан чемпионы болды, ал 2021 жылы біріншілікте қола жүлдеге қол жеткізді.

Селтикке қарсы ойыннан кейін жұлдызы жанған Темірланның танымалдығы күрт өсті. Қазір Instagram-да оны 50 мыңға жуық адам оқиды. Бір түнде 45 мыңға жуық оқырман жазылып үлгерген.

Желі қолданушылары мен оқырмандары Темірланға жылы лебіздерін мен алғыз сөздерін жарыса жазуда.

“Не деген салқынқандылық, нағыз кәсіби шебер”, “Біздің Буффон”, “Дастан Сәтпаев дейсіңдер, көп екен ғой мықтылар”, “Темірлан десе Темірлан екенсің”, “Өзбектер Әлем чемпионатына шықса, біз Чемпиондар лигасындамыз. Қалып кеткен түгіміз жоқ”, — деп жазды олар.

Кейбіреулер футболдағы пенальтиді лотереяға теңеп, кімнің жолы болса, сол жеңеді дейді. Бірақ, қақпашы тек дұрыс орындалмаған соққыларды ғана қайтара алады, ал егер ойыншы пенальтиді шебер тепсе, қақпашының мүмкіндігі аз деген де пікір бар. Екі пікірдің де жаны бар, бірақ соған қарамастан, футболда пенальтиді қайтаруда мықты маман атанған қақпашылар көп. Осы ретте футбол тарихындағы ең көп пенальти қайтарған үздік қақпашыларға да тоқталсақ.

Ральф Ферманн — 47 пенальтидің 15-сін қайтарған

Бұл қақпашының негізгі клубы “Шальке 04” болды. Көптеген пенальтиді дәл осы командада қайтарды, бір ойында екі соққыны тоқтатқан кездері де болған. Кейін ол Англияға, “Норвич Ситиге” ауысқанымен, ол жерде тек қосалқы қақпашы болып қалды. Алаңда жиі ойнағысы келген Ферманн соңында Норвегия чемпионатына кетуге бел буды. Бірақ дәл сол уақытта пандемия басталып, футболдағы жолы үзіліп қалды.

Ханс-Йорг Бутт — 47 пенальтидің 15-ін қайтарған

Карьерасының соңына қарай ол “Бавария” сапында да ойнады. Бірақ ол кезде қақпада Оливер Кан болғандықтан, Бутт көбіне қосалқы қақпашы болып жүрді. Оның ең жарқын кезеңі “Байерде” ойнаған шағы еді. Бұл қақпашы кейде өзгеше қылықтарымен көзге түсіп, жанкүйерді күлдіріп, қарсылас ойыншыларды да әдейі мазақтап қоятын. Соған қарамастан, ол сенімді ойнады. Мансабында 15 пенальтиді қайтарды, әрі өзі де сонша рет гол соқты, өйткені пенальтиді өзі тебуді ұнататын.

Роберт Энке — 37 пенальтидің 13-ін қайтарған

Өте талантты, бірақ тағдыры ауыр неміс қақпашысы. Ол 2000-жылдардың басында жарқ етіп, “Бенфика” сапында тамаша ойнады. Кейін “Барселонаға” шақырылғанда бәрі одан үлкен жетістіктер күтті. Бірақ күтпеген жағдай болып, клуб та, қақпашының өзі де ештеңе түсіндірмеді. Нәтижесінде ол каталондық командада бар болғаны бір ғана матчқа шықты да, әртүрлі клубтарға арендаға жіберіле берді.

Соңында Энке Бундеслигаға оралып, “Ганновер 96” сапында ойнады. Сол жерде ол қайтадан жақсы ойын көрсетіп, Германия құрамасына шақырту алды. Бірақ күтпеген жерден өзіне қол жұмсап, пойыздың астына түсіп қайтыс болды. Кейін оның мұндай қадамға психикалық дертке байланысты барғаны айтылды. Ал пенальтиді ол шынымен де өте шебер қайтаратын.

Диего Алвес — 52 пенальтидің 25-ін қайтарған

Бразилиялық қақпашы қазіргі кезде өз елінде “Фламенго” клубында ойнап жүр. Бірақ оның ең үздік кезеңі Испаниядағы “Валенсия” сапында өтті. Сол кезде Алвес қақпада тұрса, әр екінші пенальтиді қайтарып жүрді. Тіпті кейбір ойыншылар пенальти тебуден бас тартып, қорқып кететін. Мұндай нәтиженің кәсіби футболда қайталануы екіталай. Соған қарамастан, оны Бразилияның негізгі ұлттық құрамасына ешқашан шақырған жоқ. Тек бір рет, Бейжің Олимпиадасына қосқан, бірақ ол жерде алаңға шықпай, қосалқы қақпашы болып қалды.

Әлемдік футбол тарихында пенальти қайтарудан үздік атанған қақпашылардың жүріп өткен жолы осындай. Небәрі 21 жасар “Қайраттың” қақпашысы Темірлан Анарбеков те үлкен үміт күттіретін дарын иесі. Ол қазірдің өзінде маңызды матчта командасына жарқын жеңіс сыйлай алды. Осындай қарқынмен еңбек етіп, тәжірибе жинақтай берсе, болашақта әлемнің үздік қақпашыларының қатарынан көрінуі әбден мүмкін.

Еске сала кетейік, күні кеше, 26 тамызда “Қайрат” сенсация жасап, екі матчтың қорытындысы бойынша шотландиялық “Селтикті” жеңді. Есеп 0:0, пенальти — 3:2.