Ақтау әуежайында "Scat" әуе компаниясының Ақтау-Шымкент рейсі ұшуға дайындалып жатқанда төтенше жағдай болды, деп жазады inbusiness.kz сайты .

Қолында сәбиі бар 27 жастағы әйел ұшақта жарылғыш зат барын мәлімдеген.

Салдарынан шамамен 200 жолаушы мен экипаж мүшелері шұғыл эвакуацияланды. Ұшақты арнайы қызмет өкілдері 5 сағат бойы тексеріп шықты, алайда ешқандай жарылғыш зат табылған жоқ.

Куәгерлердің айтуынша, әйелдің бұл әрекетіне эмоциялық күйзеліс себеп болуы ықтимал. Ол рейстен түсіріліп, полицияға тапсырылды.

Көліктегі полиция департаменті деректі растады. Маңғыстау станциясындағы желілік полиция бөлімі "терроризм актісі туралы көрінеу жалған ақпарат тарату" бабы бойынша қылмыстық іс қозғаған.

Бұл бап бойынша күдікті 5 жылға дейін бас бостандығынан айырылуы мүмкін. Тергеу жалғасып жатыр.