Петропавлда Уәлиханов көшесіндегі тұрғын үйдің ауласында екі сегіз жастағы бала жанжалдасып қалған. Куәгерлердің айтуынша, осы кезде балалардың бірінің анасы екінші балаға күш қолданған. Бұл оқиға қоғамдық резонанс тудырып, қазіргі таңда полицияның бақылауында, деп хабарлайды Skifnews.kz ақпарат порталы.

Зардап шеккен баланың әкесінің айтуынша, оның ұлы аулада велосипед теуіп жүргенде екінші баламен сөз таластырып қалған. Балалар ажыраған соң, екінші баланың анасы алаңға келген.

“Ұлым аулада велосипед теуіп жүрген еді, кейін сол жерге бір әйел баласымен келді. Бір уақытта балалар сөзге келіп қалды, кейін әрқайсысы өз жөнімен кетті. Ұлым құмсалғышта отырған, ал екінші бала орындықтың жанында тұрған. Біраз уақыттан соң әлгі баланың анасы келіп, ұлымды жағасынан ұстап сүйреп, мойнынан ұрды, сосын оны өз баласына қарай ертіп апарды. Сол кезде балалар тағы да бір-біріне соққы жұмсады, — деп әңгімеледі Уәлиханов көшесіндегі №21 үйдің тұрғыны.

Оның айтуынша, аулаға орнатылған бейнебақылау камераларының жазбаларын да алған. Сол жазбаларда әйел адамның баласына күш қолданғаны анық көрінеді. Сонымен қатар, медициналық сараптама арқылы баланың денесіндегі жарақаттар расталған.

Ер адамның айтуынша, ұлы алдын ала қойылған "омыртқаның көгеруі" диагнозымен бес күнге дейін облыстық балалар ауруханасының стационарында жатқан. Бұдан бөлек, оның мойны тырналып, денесінің түрлі жерлерінде көгерген іздер болған.

Солтүстік Қазақстан облыстық полиция департаменті бұл оқиғаға қатысты қылмыстық іс қозғалғанын мәлімдеді.

"18 мамыр күні Петропавл қаласындағы үйлердің бірінің ауласында орын алған жанжал нәтижесінде жарақат алған кәмелетке толмаған баланың ауруханаға жатқызылғаны туралы хабар түсті. Полиция жанжалға қатысушылардың барлығын анықтады. Аталған факті бойынша қылмыстық іс қозғалды. Тергеу жүргізіліп жатыр, тиісті сараптамалар тағайындалды. Тергеу барысы полиция басқармасы басшылығының бақылауында", – делінген хабарламада.