Бұл туралы Caravan.kz медиа порталы Tengrinews.kz-ке сілтеме жасап хабарлайды. Тамыздың басында Президент Қасым-Жомарт Тоқаев Қазақстан

Бұл туралы Caravan.kz медиа порталы Tengrinews.kz-ке сілтеме жасап хабарлайды.

Тамыздың басында Президент Қасым-Жомарт Тоқаев Қазақстандағы алғашқы АЭС-ке атау беру үшін конкурс өткізуді ұсынған еді.

«Бұл нысанның әзірге атауы жоқ. Өйткені ол еліміздегі тұңғыш нысан болғандықтан, бүкіл ел бойынша ең жақсы атауға конкурс жариялауға болады деп есептеймін. Сіздерді де қатысуға, креатив танытуға шақырамын. Мүмкін, сіздердің ұсыныстарыңыздың бірі шешім қабылданар сәтте жарап қалар», – деді Қазақстан Президенті.

«Ваш профессиональный маркетолог» атты блогер өз Telegram-арнасында АЭС атауын белгілі бір компанияға белгілі бір мерзімге сату туралы идея айтқан. Оның айтуынша, мұндай тәсіл бюджетке қосымша табыс әкелер еді.

«Мен салынып жатқан АЭС атауын, мысалы, 10 жылға кез келген қызығушылық танытқан компанияға сататын едім. Мәселен, Siemens, ABB немесе Samsung. Ақша қарызды өтеуге жұмсалады, мерзімі өткен соң атауды қайта сатуға болады. Ал егер сатып алушы болмаса, басқа кез келген атау беруге болады. Әдемі нөмірлер бюджетке пайда әкелсе, АЭС те солай табыс әкеле алады», – деп жазды ол.

Tengrinews.kz Атом энергиясы жөніндегі агенттікке пікір алу үшін жүгінді. Ведомствоның баспасөз қызметі бұл идеяны «маркетинг тұрғысынан креативті» деп атағанымен, стратегиялық маңызы бар нысандарға қатысты қолдануға болмайтынын жеткізді.

«Ұсыныс шынымен де маркетинг тұрғысынан креативті. Алайда атом электр станциясы – Қазақстан үшін стратегиялық маңызы бар нысан. Оның атауы тарихи, мәдени және ұлттық құндылықтарды бейнелеп, ел азаматтары үшін сенім мен бірліктің символына айналуы тиіс», – деп хабарлады агенттік баспасөз қызметі.

Онда коммерциялық жобалардан айырмашылығы, атом энергетикасы бренд ретінде сатылуы немесе уақытша ротацияға берілмеуі керектігі атап өтілді.

«Сол себепті бүкіл қазақстандыққа ортақ символға айналуы үшін атауға конкурс бүкіл халықтың қатысуымен өткізіліп жатыр «, – деп мәлімдеді ведомство.

Агенттіктің ақпараты бойынша қазір мемлекеттік органдармен бірлесіп АЭС-ке атау беру конкурсын өткізудің алгоритмі әзірленіп жатыр.