Осы күні Шымкент қаласының сотында қала әкімінің орынбасары Руслан Берденовке оқ атқан Ернар Жиенбайдың соты өтуде.

Бүгін аталған іске төрағалық етуші судья Әбінұр Қарабаевтың журналист Ботагөз Омароваға тілін шығарған видеосы отандық БАҚ пен әлеуметтік желілерде кеңінен тарап кетті, деп хабарлайды inbusiness.kz сайты.

Мұндайды кәсіби мансабында алғаш рет көрген журналист әлеуметтік желідегі парақшасында оқиға барысын баяндап берді.

– Журналист болғалы көп нәрсе көрдім. Бірақ, судьяның тіл шығарғанына бірінші рет тап болдым. Шымкент әкімінің орынбасары Руслан Берденовке қастандық жасаған адамның сотында төрағалық етіп отырған судья Әбінұр Қарабаев қараптан-қарап маған тілін шығарды. Шынымды айтсам, мұны түсінбей, абдырап қалдым. Қарабаевқа не болды? Ол бұл әрекетімен не айтқысы келді? Жағдайы дұрыс па өзі, алаңдап отырмын, – деп жазды журналист Ботагөз Омарова.

Кейіннен белгілі болғандай, Әбінұр Қарабаевқа қатысты тексеру тағайындалмақ. Яғни, судьяның тәртібі жан-жақты тексеріліп, майшаммен қаралады.

– Шымкент қаласы әкімінің орынбасарын өлтіруге оқталу туралы қылмыстық істі қарау кезінде төрағалық етуші судья Әбинұр Қарабаевтың әрекеті Судья әдеп кодексін бұзу тұрғысынан тексеріліп жатыр, – деп мәлімдеді Шымкент сотының баспасөз қызметі.

Сондай-ақ, судьяның беделін түсіретін құқықбұзушылық жасау фактісі расталса, материалдар Жоғарғы Сот кеңесі жанындағы сот жюриіне жіберілетіні де ескертілген.