Бұл туралы Көлік министрлігі Автомобиль көлігі және көліктік бақылау комитеті төрағасының орынбасары Селім Қуанышұлы мәлімдеді.

Қазақстанда халыққа қызмет көрсететін 10 500 автобустың төрттен бірі әбден тозған, деп жазады inbusiness.kz сайты.

Оның айтуынша, 2024 жылдың қорытындысы бойынша автобустардың 25%-ы ескі саналады. Ал төрт жыл бұрын бұл көрсеткіш 45% болған. Жыл сайын көлік паркі жаңартылып келеді. Үкіметтен жергілікті атқарушы органдарға қаражат бөлініп, жеңілдетілген лизинг арқылы жаңа автобустар алынады. Тасымалдаушылардың бір бөлігі автобусты мемлекеттік қолдаумен, қалғанын өз кірісі есебінен сатып алады. Бұған қоса, әлеуметтік маңызы бар бағыттарға бюджеттен субсидия бөлінеді.

Селім Қуанышұлы ескі автобустардың жолаушылар тасымалына шығар алдында міндетті түрде тексеруден өтетінін айтты.

– Жолаушыларды тасымалдайтын көліктер жылына екі рет техникалық байқаудан өтеді. Тексеруден өтпесе, жолға жіберілмейді. Сонымен қатар әр автобус күн сайын автопаркте жеңілдетілген бақылаудан өтеді. Қауіпсіздік мәселелері толық ескерілген, – деді ол Үкімет отырысынан кейінгі брифингте.