Қазақстанның Қарулы күштері қызметтік мәліметтермен алмасу үшін отандық Aitu мессенджеріне кезең-кезеңмен көшуді бастады, деп хабарлайды KAZ.NUR.KZ Қорғаныс министрлігінің ресми сайтына сілтеме жасап.

Қазақстан Республикасының Қорғаныс министрі, авиация генерал-лейтенанты Даурен Қосанов Қазақстан Қарулы күштерінің барлық бөлімшесін Aitu мессенджеріне кезең-кезеңмен көшіруді тапсырды.

Ведомстводағылардың айтуынша, бұл шешім шетелдік платформаларды пайдаланған кездегі тәуекелдерді азайтуға бағытталған.

Көшу процесі 2025 жылдың соңына дейін аяқталады. Бұл ретте армияның ұйымдық-штаттық құрылымы мен қолданыстағы байланыс арналары ескеріледі. Мұндай тәсіл қызметтік процесті бұзбай, жүйелі әрі біртіндеп интеграцияны қамтамасыз етеді.

"Ұлттық IT-өнімдерді қолдану – цифрлық кеңістіктегі дербестікті қорғауға бағытталған жаһандық үрдіс. Қарулы күштердің Aitu мессенджеріне көшуі қызметтік деректердің сыртқа таралуына жол бермей, қызметтік мақсаттағы ақпаратты тиісті деңгейде қорғайды", — деп атап өтті Қорғаныс министрінің цифрландыру жөніндегі орынбасары Дархан Ахмедиев.

Жаңа мессенджер кең ауқымды міндеттерді шешу үшін қолданылады. Оның ішінде жедел ақпарат алмасудан бастап, жиналыстар өткізу мен іс-қимылдарды үйлестіру шаралары да бар. Бұл қауіпсіздік деңгейін арттырып қана қоймай, ішкі коммуникацияны да оңтайландыруға мүмкіндік береді.

Мәтіннен қате тапсаңыз, бізге жазыңыз