Қазақстандағы жылдың басты теннис оқиғаларының бірі — ATP 250 Almaty Open турнирі жақындап қалды, деп хабарлайды Zakon.kz.

Ұйымдастырушылар тағы төрт танымал теннисшінің қатысатынын растады:

• екі ATP турнирінің (бірі — жекелей сында) жеңімпазы, 2022 жылғы жастар арасындағы Next Generation ATP Finals турнирінің чемпионы, әлемнің 32-ракеткасы америкалық Брэндон Накашима;
• 2023 жылғы Next Generation ATP Finals турнирінің жеңімпазы, әлемнің 64-ракеткасы серб Хамад Меджедович;
• жекелей сында екі ATP турнирін ұтқан, әлемдік рейтингте 32-ші орында тұрған италиялық Лучано Дардери;
• сондай-ақ Қазақстанның екінші ракеткасы Александр Шевченко.

Еске салсақ, 2023 жылы ATP 250 Astana Open турнирінде ұйымдастырушылар Меджедовичке wild card берген еді. Сол кезде серб жартылай финалға дейін жетіп, жарыстың басты жаңалықтарының біріне айналды.

Бұған дейін Almaty Open турниріне қатысатынын мыналар растаған:

• турнирдің қазіргі чемпионы Карен Хачанов,
• 2021 жылғы US Open жеңімпазы Даниил Медведев,
• 2021 жылғы Roland Garros және 2023 жылғы Australian Open финалисі Стефанос Циципас,
• Қазақстан құрамасының көшбасшысы және ATP турнирлерінің жеті дүркін чемпионы Александр Бублик,
• сондай-ақ екі ATP турнирінің жеңімпазы италиялық Флавио Коболли.