Түркістан облысының тұрғыны адам өлтіргені үшін және оқ-дәрілерді сақтағаны үшін 20 жылға сотталды, деп хабарлайды KAZ.NUR.KZ облыстық соттың баспасөз қызметіне сілтеме жасап.

️2025 жылы 25 маусымда Түркістан облысы Жетісай ауданы Алғабас ауылында жантүршігерлік оқиға болған. Ауыл тұрғыны әйелмен жанжалдасып, оны жіппен қылқындырған. Жәбірленуші әйел сол жерде көз жұмған. Қылмысын жасыру үшін ол әйелдің денесін өз үйінің ауласында көмген.

Оған қатысты Қылмыстық кодекстің 99-бабының 1-бөлігімен (адам өлтіру), 287-бабының 3-бөлігімен (оқ-дәрілерді заңсыз алу және сақтау бабымен) қозғалған қылмыстық іс сотта қаралды.

Сотта сондай-ақ сотталушы өз үйінде ойық ұңғылы аңшылық атыс қаруының 32-дана оқ-дәрілерін заңсыз сақтағаны анықталды.

Облыстық соттың мәліметінше, сотталушының кінәсі толық дәлелденді. Ол қылмысты мойындайтынын айтқан, одан бөлек куәлердің жауаптары, сот сараптама қорытындылары және істің басқада құжаттары қылмысты сотталушы жасағанын дәлелдеді.

Прокурор сотталушының бұрын-соңды аса ауыр қылмыс жасағанын ескеріп, 20 жылға бас бостандығынан айыруды сұрады. Ал сотталушы кінәсін мойындап, жеңіл жаза тағайындауды сұрады.

Сот оның кәмелетке толмаған баласы бар екенін жеңілдететін мән-жай деп танып, ал ауырлататын мән-жай ретінде қылмыстың қайталануын қабылдады.

11 тамызда сот үкімімен сотталушыға 20 жылға бас бостандығынан айыру жазасы тағайындалды. Сондай-ақ 10 млн теңге көлемінде моральдық шығын өндірілді.

Мәтіннен қате тапсаңыз, бізге жазыңыз