Елімізде ет бағасы шарықтады. Былтырғымен салыстырғанда еттің бағасы 20-30 пайызға дейін өскен, деп хабарлайды "КТК" арнасы.

Бағаның аспандауынан халық арасында етке деген сұраныс та едәуір азайыпты. Сарапшылар күн суытқанда ет құны тағы да көтерілуі мүмкін дейді. Өйткені ала жаздай қуаңшылық қысқан төрт түлікті күтіп-баптау қымбат. КТК тілшісі ет дүкендері мен базардағы ет бағасын салыстырып көрді.

20 жылдан астам уақыт отбасымен ет сататын Ахатжан Смағұл бағаның күн санап құбылуы кәсіпкерлерге де қиындық туғызып жатқанын айтады. Өйткені сөреде тұрған етке халықтың қызығып қарағаны болмаса, соңғы уақытта сатып алушылардың қарасы едәуір азайған.

"Осы уақытқа дейін өспей тұрып, күніне бір 350-400 адамдай келсе, қазір 200-250 ғана. Клиенттер шағым айтып жатыр. Зейнеткерлер ет алуды қойды. Ет қымбаттады. Зейнеткерлер сүйектер мен бауыр-бүйрек дегенді ғана алады. Ал таза етті алуды қойды", — дейді Ахатжан Смағұл.

Еттің бағасы соңғы жарты жылда қатты қымбаттап кетті. Соңғы бір жылда ет бағасы 20, кей жерде 30 пайызға өскен. Әсіресе сиыр еті қымбаттаған.

Дүкен мен базардағы бағаны салыстырсақ, айырмашылығы айқын байқалады. Орта есеппен дүкенде әр еттің келісі базардан қарағанда 200-300 теңгеге қымбат. Мысалы, базарда сиыр етінің бір келісі 4700 теңге болса, дәл осы ет дүкенде 5000 теңгеден жоғары. Бұл әр отбасының айлық шығынына әсер етеді. Сол себепті біреу сапасына қарап дүкеннен алса, енді біреу бағасына қарап базарды таңдайды.

Сарапшылар бағаның бейберекет кетуіне көрші елдердегі сұраныс пен жем-шөптің қымбаттауы себеп дейді.

"Себептері түсінікті, қисынды. Бұл – мал бордақылайтын аймақтардағы жем-шөптің қымбаттауы. Жаһан климатының өзгеруі елімізде де белгілі бір өзгерістерге әкеліп, оңтүстікте қуаңшылық болып, мал азығы, дәнді дақыл қурап кеткен. Соның салдарынан оңтүстіктегі жем-шөп қоры зардап шекті. Иә, солтүстікте жем-шөп бар, бірақ бүкіл елімізде жеткізу мен логистика қымбат. Сондықтан бізде ет қымбаттады. Күзде тағы да қымбаттауы мүмкін", — дейді ауыл шаруашылығы саласының сарапшысы Кирилл Павлов.

Кәсіпкерлер мен сарапшылардың уәжі қабыспағанымен, шаруа қожалықтарынан тікелей ет таситындар баға тағы аспандайтынын айтады. Ал базар жағалаған қараша "бүйте берсек, ет тек түсімізге кіреді" деп қынжылады.

Дереккөз: "КТК" арнасы

Мәтіннен қате тапсаңыз, бізге жазыңыз