Атырау облысында тергеу изоляторынан жазасын өтеу мерзімі аяқталмаған азаматты бостандыққа шығарып жіберген. Бұл ақпаратты ІІМ-нің Қылмыстық-атқару комитеті растады деп хабарлайды KAZ.NUR.KZ.

Белгілі болғандай, оқыс жағдай қызметкердің қателігі салдарынан орын алған. Тергеу изолятырының маманы сотталған адамды мерзімінен бұрын босату туралы құжат рәсімдеп, нәтижесінде ер адам бостандыққа шығып кеткен.

Алайда заңбұзушылық дер кезінде анықталып, қателікпен түрмеден босап шыққан ер адам қайтадан тергеу изоляторына қайтарылды.

"Аталған факті бойынша қылмыстық іс қозғалып, қызметтік тергеу жүріп жатыр. Кінәлі лауазымды тұлғалар заңнамаға сәйкес қатаң жауапкершілікке тартылады", — деп хабарлайды Қылмыстық-атқару комитетінің баспасөз қызметі.

"Ақ Жайық" басылымының хабарлауынша, бұл қателікке сотталған азаматтардың фамилияларының ұқсас болуы себеп болған.

Мәтіннен қате тапсаңыз, бізге жазыңыз