Үкіметтегі брифингте Ғылым және жоғары білім министрі Алматыдағы жоғары оқу орындарын Қонаевқа көшіруге қанша уақыт кететінін айтты, деп хабарлайды KAZ.NUR.KZ тілшісі.

"Бұл – ұзақ мерзімді жоба, оңай емес. Неге? Өйткені инфрақұрылымды реттеу үшін үлкен қаражат керек. Бұл жаңа қала, яғни, кәріз суларын тазарту құрылыстарын салу, көлік инфрақұрылымын салу, бөлек жылу электр орталығын салу, бөлек сорғы станцияларын салу, кәріз жүйелерін салу, су құбырларын тарту қажет.

Бүгінгі таңда бас жоспар бекітілген, Қонаев қаласын дамыту жоспары бар. "Академқалашыққа" 120 гектардай жер бөлінді, бірақ қазір инфрақұрылымның дайын болғанын күтіп отырмыз", — деді министр Саясат Нұрбек.

Министр қандай жоғары оқу орындары Қонаевқа көшуге қызығушылық танытқанын айтты.

"Алдын ала мәлімет бойынша Сәтбаев университеті, Абай атындағы Қазақ ұлттық университеті, Қыздар педагогикалық университеті және "Қайнар", AlmaU, "Тұран" секілді жекеменшік университеттер қызығушылық танытып отыр.

Алайда бәрі сол инфрақұрылымға келіп тіреледі. Яғни, ЖОО-лар инфрақұрылым салумен айналыса алмайды. Инфрақұрылым тартылса, құрылыс жұмыстары біртіндеп басталады", — деді министр.

Оның айтуынша, инфрақұрылымды дамытуға кем дегенде 1-2 жыл кетсе, құрылыс кезеңі тағы 2-3 жылға созылады. Осылайша, университеттердің алғашқы легі 2030 жылы немесе одан сәл ертерек көшуі мүмкін.

Мәтіннен қате тапсаңыз, бізге жазыңыз