Өзбекстан астанасында өткен америкалық супержұлдыз Дженнифер Лопестің концерті қала қазынасына қомақты кіріс түсірді.

Мәдениет пен өнерді дамыту қорының мәліметінше, 2025 жылғы 7 тамызда "Бунёдкор" стадионында өткен шарадан 42,5 млрд сумнан – шамамен 3,3 млн доллар – астам салық түскен, деп жазады inbusiness.kz сайты.

Бұл – Өзбекстан тарихында ААА санатындағы әртіс қатысқан алғашқы концерт. Оған жалпы 31 144 адам жиналды (оның ішінде стадион қызметкерлері де бар). 25 мың билет сатылып, олардың 67%-ын шетелдіктер сатып алған.

Концертке 15 330 шетелдік турист келген. Олардың 8 945-і – Ресейден, 2 495-і – Қазақстаннан, қалғандары Еуропа мен АҚШ-тан.

5–8 тамыз аралығында Ташкент қонақүйлерінің жүктемесі өткен жылмен салыстырғанда 25,7%-ға артқан. Ал 7 тамыз күні Чилонзор метро желісі 16 500-ден астам жолаушыны тасымалдады.

Шараны ұйымдастыруға 115 ұйым атсалысты. Оқиға орнында 18 фуд-корт пен сауда нүктесі жұмыс істеді. Қоғамдық тәртіпті сақтау үшін 88 патрульдік және арнайы техника, 8 жедел жәрдем көлігі жұмылдырылып, 3 800 полиция қызметкері, 300 ерікті және 500 тазалықшы жұмыс істеді.