Алматы облысында тікұшақты іздеу-құтқару жұмыстары жалғасып жатыр. Әскери тікұшақ құлады деген аймақта екінші адамның денесі табылды, деп хабарлайды Қорғаныс министрлігінің ресми сайтына сілтеме жасаған KAZ.NUR.KZ.

"EC-145 тікұшағы құлаған аймақта іздестіру-құтқару іс-шараларының жалғасуы барысында екінші адамның денесі табылып, судан шығарылды. Қазіргі уақытта құзыретті органдардың қатысуымен анықтау рәсімі жүргізіліп жатыр.

Естеріңізге сала кетсек, іздеу жұмыстары Қорғаныс министрлігінің, ТЖМ, ІІМ және басқа да ведомстволардың барлық қажетті күш-құралдарын жұмылдыра отырып, тәулік бойы іске асырылып жатыр", — делінген хабарламада.

Естеріңізге сала кетейік, 25 шілдеде әлеуметтік желіде Алматы облысында ЕС-145 әскери тікұшағы іздестіріліп жатқаны туралы ақпарат тарады. Тікұшақ Луговой елді мекенінен ұшып шыққаннан кейін онымен Отар аумағында байланыс үзілген.

Кейінірек Қорғаныс министрлігі Алматы облысында жоспарлы ұшу барысында Қазақстан Қарулы Күштері Әуе қорғанысы күштерінің EC-145 тікұшағы радардан жоғалып кеткенін мәлімдеді. Алдын ала мәлімет бойынша, тікұшақ бортында үш экипаж мүшесі болған.

26 шілдеде жоғалған тікұшаққа тиесілі болуы мүмкін бөлшектер табылды.

Іздестіру операциясына 400-ден астам адам, кинологиялық топтар, 70-тен астам жерүсті техникасы, 21 жүзу құралы, 10 ҰҰА, эхолоттар, суасты сканерлеу құралдары жұмылдырылған.

Кеше, 9 тамызда жоғалған тікұшақтың сынықтары мен бір адамның денесі табылғанын жазған едік.

Мәтіннен қате тапсаңыз, бізге жазыңыз