АҚШ Президенті Дональд Трамп Ресей Президенті Владимир Путинмен өтетін кездесудің нақты уақыты мен орнын жариялады.
Бұған дейін кездесудің әлемге әйгілі жерде өтетінін айтқан еді. Бұл ретте БАҚ өкілдері ықтимал орын ретінде Италия, БАӘ, Мажарстан және Швейцарияны атаған.
Путин болса, Біріккен Араб Әмірліктері қолайлы болар еді деген пікір білдірген.
– Ресей Президенті Владимир Путинмен көптен күткен кездесуім осы жұма, 15 тамыз күні АҚШ-тың ұлы штаты – Аляскада өтеді. Толығырақ кейін жазамын. Назарларыңызға рахмет, – деп мәлімдеді Трамп әлеуметтік желідегі парақшасында.
Аляскадағы бұл жүздесу – Ақ үйге қайта оралғаннан кейін Трамп пен Путиннің алғашқы жеке кездесуі болмақ.
Айта кетейік, АҚШ Халықаралық қылмыстық соттың заңын мойындамайды және оның Владимир Путинді тұтқындау туралы ордерін орындамайды.
