Шымкенттік полицейлер кезекшілікте жүрген кезінде кенет көліктен шыққан өртті байқап қалып оны дер кезінде сөндіріп үлгереді. Осылайша тәртіп сақшылары өрттің салдарынан туындауы мүмкін төтенше жағдайдың алдын алды, деп жазады Egemen.kz.

Келеңсіз оқиға Сайрам аймағындағы орталық көшелердің бірінде болған. Патрульдік полиция полкінің 3-рота инспекторлары – полиция аға лейтенанттары Өскенбай Бексұлтан мен Хамра Нұрсұлтан – қызметтік міндеттерін атқару барысында көліктің отқа оранғанын байқап, дереу сол жерге асығады. Олар қызметтік автокөліктерінен өрт сөндіргішті алып шығып, қызыл жалынға оранған машинадағы өртті сөндіруге ұмтылады. Кейін жақын маңдағы көгалды суаруға арналған құбыршекпен көлікке қарай су шашады. Өрт сөндіру қызметі келгенше тәртіп сақшылары машинадағы өртті сөндіріп үлгереді.

Көлік жүргізушісі полиция қызметкерлерінің жедел әрекетіне әрі кәсіби шеберліктееріне тәнті болып шын жүректен алғысын білдірді. Батылдықтарының арқасында өрт дер кезінде ауыздықталып, көлігі аман қалғанын, үлкен шығынға ұшырамағанын атап өтті.

Полиция өкілдері мен өрт сөндіру қызметі мамандарының айтуынша көлік құралдарында өрт қауіпсіздігін қамтамасыз ету үшін тез тұтанатын және жанғыш сұйықтықтарды пайдалануға болмайды. Сондай-ақ, аккумуляторды көлік ішінде зарядтамау керек. Және міндетті түрде жарамды өрт сөндіргіш құралын алып жүру – қауіпсіздіктің басты талаптары боп саналады.

Шымкент қаласының полицейлері азаматтардың қауіпсіздігі үшін тәулік бойы қызмет атқаруды жалғастырады.