Ұйымдастырушылар заңсыз бизнестен бір миллиард теңгеден астам пайда көрген.

Шығыс Қазақстан облысында жас қыздарды жалаңаш видеоға түсіріп, табыс тапқандар құрықталды, деп хабарлады 31 арнаның Информбюро ақпараттық бағдарламасы.

Қылмыстық топ Өскеменнен бөлек тағы бірнеше қалада "модельдік агенттіктің" атауын жамылып вебкам студиялар ашқан. Нақтырақ айтсақ, бір топ азамат Қазақстанның оннан астам қаласында вебкам студиялар ашып, ашық трансляциялар жүргізіп отырған.

Олар 18 бен 25 жас аралығындағы қыздарды жұмысқа тартып, айына 2 миллион теңгеге дейін табыс табасың деп уәде берген. Жалған модельдік агенттіктерді тінту кезінде 100-ден астам компьютер, вебкамералар мен жарықтандыру құрылғылары тәркіленді.

Полицияның мәліметінше, ұйымдастырушылар заңсыз бизнестен бір миллиард теңгеден астам пайда көрген.

"Қазіргі таңда бұл іске қатысы бар 14 адам ұсталды. Олардың арасында осы бизнесті ұйымдастырған негізгі тұлғалар да бар. Тергеу аяқталуға жақын", – деді ШҚО полиция департаменті бастығының бірінші орынбасары Алмаз Төкенов.