Әсем Нүсіпова Алматы қаласы әкімінің орынбасары қызметінен өз еркімен босатылды, деп хабарлайды қала әкімінің баспасөз қызметіне сілтеме жасаған KAZ.NUR.KZ.

Әкімдік өкілдерінің хабарлауынша, Әсем Нүсіпова бүгін, 2025 жылдың 7 тамызында қызметінен кетті.

"2022 жылдың ақпанынан бастап ол білім беру, денсаулық сақтау, жұмыспен қамту және халықты әлеуметтік қорғау салаларына жетекшілік етті", — делінuен хабарламада.

Еске сала кетейік, Әсем Нүсіпова бұл қызметке 2022 жылдың ақпанында Ерболат Досаев Алматы әкімі болып тұрған кезде тағайындалған.

Әсем Нүсіпова 1975 жылы 1 мамырда Алматыда дүниеге келген.

Ол әл-Фараби атындағы Қазақ мемлекеттік университетін "экономика және менеджмент" мамандығы бойынша магистратура мен аспирантурасын бітірген.

Еңбек жолын 1999 жылы Әл-Фараби атындағы Қазақ мемлекеттік университетінде ассистент қызметінен бастады. 2001 жылы Қазақстан Республикасы Қауіпсіздік кеңесінің экономикалық қауіпсіздік мәселелері жөніндегі бөлімінің бас сарапшысы болып тағайындалды, 2002-2003 жылдар аралығында Қазақстан Республикасы Президенті әкімшілігінің жүйелі зерттеулер орталығы секторының меңгерушісі қызметін атқарды.

2003-2005 жылдары — Қазақстан Республикасы Қаржы министрінің кеңесшісі, (қоса атқару бойынша) Бірыңғай экономикалық кеңістікті қалыптастыру жөніндегі ЕурАзЭҚ хатшылығы жанындағы ұйымдастыру-сараптама тобының кеңесшісі, сондай-ақ 2005 жылы Қазақстан Республикасы премьер-министрінің кеңесшісі, Премьер-министр кеңесшілері тобының жетекшісі болды.

2006 жылы — Премьер-министр кеңсесінің Жиынтық талдау бөлімінің меңгерушісі болған.

2007 жылдан бастап 2008 жылға дейінгі кезеңде Қазақстан Республикасының Денсаулық сақтау вице-министрі лауазымын атқарып, кейіннен 2016 жылға дейін "ҚазТрансОйл" АҚ бас директорының экономика және қаржы жөніндегі орынбасары болды.

2016-2019 жылдар аралығында Әсем Нүсіпова Шығыс Қазақстан облысы әкімінің орынбасары болды. 2020 жылы Қазақстан Республикасы Денсаулық сақтау министрлігінің жауапты хатшысы лауазымында, 2020 жылдың қазан айынан бастап денсаулық сақтау вице-министрі қызметін атқарды.

2022 жылдың ақпанында Алматы қаласы әкімінің орынбасары болып тағайындалған.

Мәтіннен қате тапсаңыз, бізге жазыңыз