Атырауда ортағасырлық күміс тиындар табылды. Археологтар тарихи жәдігерді "Ақтөбе-Лаэти" қалашығында жүргізілген қазба жұмыстары кезінде анықтаған, деп хабарлайды KAZ.NUR.KZ Жетінші арнаға сілтеме жасап.

Телеарна мәліметінше, ежелгі бұйым Жошы ұлысында құрылған Алтын Орда мемлекетінің билеушісі Меңгу-Темір ханның тұсында құйылған деген дерек бар.

Бұдан өзге зерттеушілер қазба жұмыстары кезінде, көрнекті артефакт "Тағара" ыдысын да тапты.

"Бұл тиындар, белгілі нумизматик ғалым Павел Петровтың пайымдауынша, ХІІІ ғасырдың екінші жартысына сәйкес келеді. Құйма ақшаның бір бетінде Меңгу-Темір ханның таңбалары, екінші жағында Қытай иероглифтері бейнеленген. Оның себебі Шыңғысханнан тараған Құбылай ұрпақтары мен Шағатай ұлысы арасында қақтығыстарда қолға түскен саяси тұтқын Номуханмен байланыстырылады", — дейді археолог Амангелді Мұғау.

ТММ зерттеу орталығының басшылығы қалашықтың болашағына қатысты жоспарын бөлісті.

"Соңғы екі-үш жылдықта бұл жерге ерекше көңіл бөліп жатырмыз. Қалашықтың 53 гектар аумағы толықтай қоршалды. Болашақта ашық аспан астындағы музейге айналдыруды жоспарлап отырмыз", — дейді зерттеу орталығының басшысы Толыбай Достыбаев.

Мәтіннен қате тапсаңыз, бізге жазыңыз