Оның орнына жолаушылар үшін заманауи әрі жайлы ғимарат салынады.

Атырау облысы, Мақат ауданы Доссор ауылында теміржол вокзалының ғимараты бұзылды. Нысанның жобалық-сметалық құжаты 2024 жылы әзірленді, деп жазады inbusiness.kz сайты.

ҚТЖ мәліметінше, 2024 жылы Доссор стансасы арқылы күн сайын ондаған жолаушылар пойызы жүріп, жолаушылар ағыны тәулігіне 80 адамды құраған.

Биыл жолаушылар тасымалы бар станциялардағы инфрақұрылымды жаңарту аясында вокзалды қайта жаңғырту жұмыстары жүргізіледі.

Жобаға сәйкес, күрделі жөндеуге ғимараттың қасбетін толық жаңарту, барлық инженерлік және санитарлық желілерді ауыстыру, жарықтандыру жүйелерін жаңарту, навигациялық және цифрлық қызметтер кіреді.

Мүмкіндігі шектеулі үшін қолжетімділікті қамтамасыз етуге ерекше көңіл бөлінбек. Вокзал ғимаратында пандустар, заманауи санитарлық тораптар, ана мен бала бөлмесі, сондай-ақ мүмкіндігі шектеулі жандарға арналған арнайы демалыс орындары болады.

Бекет заманауи қауіпсіздік жүйелерімен, электронды кезекпен, бейнебақылау және өзіне-өзі қызмет көрсету терминалдарымен жабдықталады.