Кеше Мемлекеттік басқару академиясында Мемлекет басшысының тікелей бастамасымен қолға алынған Президенттік жастар кадр резервіне кезекті іріктеудің талаптарын түсіндіру мақсатында кездесу өтті.

Іс-шараға 250-ге жуық орталық мем­лекеттік органдар мен оған қарасты ұйым­дардың, жергілікті атқарушы ор­ган­ның, квазимемлекеттік сектор­дағы ком­паниялардың қызметкерлері, сон­дай-ақ Президенттік жастар кадр резервінің мүшелері қатысты.

Жиын шымылдығын Мемлекеттік қызмет істері агенттігінің төрағасы Дархан Жазықбай ашып, Президенттік жас­тар кадр резерві жөнінде әңгімелеп, агенттіктің алдағы жоспарларымен таныстырды.

«Мемлекет басшысы Қасым-Жомарт Тоқаев 2019 жылы Президенттік жастар кадр резервін жасақтау қажеттігі туралы бастама көтеріп, осы тапсырманы біздің агенттікке жүктеген еді. Содан бері агенттік аталған жобаны табысты жүзеге асырып келеді. Біз бұл бастама аясында жастарды мемлекеттік басқару жүйесіне белсенді түрде тартуға, олардың мемлекеттік қызметтегі үлесін арттыруға мүмкіндік алып отырмыз», деді ол.

Сондай-ақ спикер 1 маусымнан бас­тап, жастар кадр резервінің жаңа іріктеу ке­зеңі басталатынын, ол сында жасы 35-тен аспаған, жоғары білімі мен кемі 5 жыл­дық жұмыс өтілі бар, мемлекеттік тіл­ді В деңгейінен төмен емес меңгерген кез келген ел азаматтары бақ сынай алаты­нын айта келіп, бүгінгі кездесудің бас­ты мақсаты жастарға осы жоба туралы жан-жақты мәлімет беруге бағытталып отыр­ғанын жеткізді. Агенттік басшысы алдағы уақытта аймақтарда да осындай кездесулер ұйымдастырылатынын тілге тиек етті.

Агенттік төрағасы іріктеудің 2025 жыл­дың маусым-қазан айлары аралығында өтетінін, сын бірнеше кезеңнен тұратынын, нәтижесінде резервке үздік 50 кандидат іріктеліп, резервшілер 3 жыл ішінде конкурстық іріктеуден өтпей тікелей түрлі мемлекеттік лауазымдарға тағайындалуы мүмкін екенін жеткізді. Сондай-ақ Д.Жазықбаев қатысушыларды биыл алты салалық бағыт бойынша бақтарын сынауға шақырды: инфрақұрылымды, өнеркәсіпті дамыту және сауда саясаты, агроөнеркәсіптік кешен және қоршаған ортаны қорғау, сыртқы саясат және инвестициялар, экономикалық және қаржылық саясат, цифрландыру, әлеуметтік саясат және азаматтық қоғам.

«Еліміздің дамуына үлес қоса алатын білімді, білікті, белсенді жастарға мемлекеттік қызметтің есігі әрдайым ашық болуға тиіс. Президенттік жастар кадр резерві – үлкен мүмкіндік. Қазіргі таңда резерв құрамында 400-ге жуық жас бар, олардың 318-і тұрақты жұмыс­қа орналасып, кейбірі қызметте өсіп, жа­уапты лауазымдарға тағайындалды», деді агенттік төрағасы.

Президенттік жастар кадр резерві арқылы Цифрлық даму, инновациялар және аэроғарыш өнеркәсібі министрлігіне қарасты Жасанды интеллект және инновацияларды дамыту комитетінің төрағасы болып тағайындалған Ғиззат Байтұрсынов Президенттік жастар кадр резерві – жастардың қызметтік өсуіне даңғыл жол ашып отырғанын айтады.

«Президенттік жастар кадр резервін жас мамандардың өздерін жан-жақты көрсетуіне, білімі мен әлеуетін пайдаланып, мемлекеттік қызмет пен квазимемлекеттік секторда жауапты лауазымдарға көтерілуіне жол ашатын әлеуметтік лифт деуге болады. Жоба – заманауи әрі болашағы зор, еліміздің кадр саясатына серпін беретін ауқымды бастама», деді ол.

Ғиззат Сейдахметұлы Президенттік жастар кадр резервіне кіру жолындағы жеке тәжірибесімен бөлісіп, мемлекеттік қызметке 2020 жылы штаттан тыс қызметкер болып келгенін, бар болғаны төрт жыл ішінде басқарушы қызметке дейін көтерілгенін, мұндай нәтижеге жетуіне Президенттік жастар кадр резерві мүмкіндік туғызғанын әңгімеледі.

Ал Президенттік жастар кадр резервінің мүшесі ретінде Халықаралық бағдарламалар орталығының басқарма төрағасы болып қызметке келген Әділ Құсманов: «Мен – қазір Халықаралық бағ­дар­ламалар орталығының басқар­ма төр­ағасымын. Бұл мекеме «Болашақ» халықаралық стипендиялық бағдар­ламасының жұмыстарын үйлестіреді. Біздің басты мақсатымыз – шетелдің мықты оқу орындарына білімді студент­терді жіберіп, еліміздің экономикасына қажетті мамандарды даярлау. Жыл сайын әлемнің үздік университеттеріне кемінде 600 азаматты оқуға жібереміз. Қазіргі таңда орталық аясында трансформация кезеңі жүріп жатыр. Қазақстанның дамуы үшін ең қажетті және сұранысқа ие ма­мандықтарға басымдық берудің тетіктерін енгізуге атсалысып жатырмыз. Мысалы, биылдан бастап атом энергетикасы саласына бағытталған мамандықтарға басымдық беру ойымызда бар», деді.

Ресми деректерге сүйенсек, 2019, 2021 және 2023 жылдары Президенттік жас­тар кадр резервіне жалпы 60 мыңнан аса азамат қызығушылық танытқан. Іріктеу­лер қорытындысы бойынша резервке 400 адам қабылданып, бүгінде олардың 318-і жауапты қызметтерге тағайында­лып­ты. Резервшілердің 167-і – орталық мемлекеттік органдарда, 37-і – жергілікті атқарушы органдарда, 62-і – ұлттық компанияларда, 52-і өзге ұйымдарда қызмет етіп жатыр. Сондай-ақ 39 резервші – сая­си, үшеуі «А» корпусының лауазымдарына тағайындалған. Ал екі резервші Мәжіліс депутаты, біреуі мәслихат депутаты болып сайланған.