Бұл жер аштықтың алаңына айналып барады.

Газадағы ашаршылықты тоқтату үшін күн сайын жүздеген жүк көлігі азық-түлік жеткізуі керек, деп жазады inbusiness.kz сайты.

Біріккен Ұлттар Ұйымының Гуманитарлық мәселелерді үйлестіру басқармасының өкілі Йенс Лерке ондағы жағдайдың аса ауыр екенін айтып дабыл қағуда. Женевадағы БҰҰ бөлімшесінде өткен апта сайынғы баспасөз мәслихатында ол адам шошырлық жайттарды жария етті.

– Газада ең қажетті заттардың өзі мүлдем жетіспейді, адамдар күн сайын аштықтан қырылып жатыр. Бұл бұрын-соңды болмаған апат. Күн сайын жүздеген жүк көлігі қажет. Апта емес, ай, бәлкім жылдар бойы солай. Біз ашаршылықтың шегіне жеттік. Бұл жағдай бір түнде шешілмейді, – деп алаңдаушылық танытты ол.

Леркенің сөзінше, соңғы уақытта жеткізілген гуманитарлық көмек теңізге тамған тамшыдай ғана әсер қалдырған.

– Бұл мақтауға тұрмайды. Бізде мыңдаған тонна гуманитарлық жүк бар, оның арасында донорлар қаржыландырған азық-түлік те кездеседі. Ол Газа шекарасында күтіп тұр. Бұл заттар тегін түрде мұқтаж жандарға жеткізілуі тиіс. Бірақ бізге қажетті жағдай да, қолдау да жасалмай отыр, – деді БҰҰ өкілі.

2023 жылдың 7 қазанынан бері Израильдің әскери шабуылдары салдарынан Газада кемінде 70 мыңға жуық палестиналық қаза тапқан деген ақпарат бар. Одан бөлек, 150 мыңнан аса адам жарақат алса, 2-3 миллион тұрғынның 2 миллионнан астамы босқынға айналып отыр.

Осыған дейін әлемге әйгілі актриса Анджелина Джоли Газаның ашық аспан астындағы түрмеге айналғанын айтқан болатын.

Бірнеше күн бұрын ғана "Ашаршылық әрбір есікті "қағып" тұр" деп Газадағы жағдайдың дабыл қағарлық дәрежеге жеткенін жазған едік.