Атаулы әлеуметтік көмек алатын 5 мың адамға азық-түлікті ваучер арқылы қолжетімді бағаға беріледі. Бұл туралы үкіметте есеп берген сауда және интеграция министрі Арман Шаққалиев мәлімдеді, деп хабарлайды Almaty.tv тілшісі.

Үкіметте Арман Шаққалиев бірқатар жаңалықтың шетін шығарды. Ол атаулы әлеуметтік көмек алатын 5 мың адамға азық-түлікті ваучер арқылы беремін деп бекініп отыр. Ведомство басшысы президенттің атаулы әлеуметтік көмекке көшу жөніндегі тапсырмасын іске асыру үшін осындай пилоттық жобаны іске қоспақшы. Осылайша халық күнделікті ішіп-жеп жүрген асын ваучер арқылы қолжетімді бағамен сатып ала алады.

"Пилоттық жобаны Ақкөл, Көкшетау және Павлодар қалаларында жүргізу жоспарланып отыр. Оған бес мыңға жуық атаулы әлеуметтік көмек алушы кіреді. Жоба өңірлік сапарлар барысында парламент депутаттары тарапынан қолдау тапты және қоғамдық талқылаудан сәтті өтті", – деді сауда және интеграция министрі Арман Шаққалиев.

Тағы бір жаңашылдық – елімізде фермерлердің тауарларына арналған агромаркетплейс іске қосылады. Осылайша Шаққалиев жер емген шаруалар мен сауда желілерін, меморгандардың арасында тікелей байланыс орнатып, делдалдардың жолын кеспек. Жаңа форматтағы отандық B2B платформасын да әзірлеп жатыр. Ол көтерме импортты реттеуге, шағын және орта бизнесті қолдауға бағытталған.

Осы тұста Цифрлық даму вице-министрі Қазақстан цифрландыру арқылы экспортқа қатысты өтінімдерді қарау тиімділігін 60 пайызға арттыруға ниетті екенін жеткізді. Бұған дейін мамандар құжаттарды базаға енгізіп уақыт созса, енді автоматтандырылады.

"Реинжиниринг нәтижесінде жасанды интеллект қолданысымен орталықтандырылған цифрлық платформа жүзеге асырылады. Ол хабарламаларды интеграцияланған жүйеге біріктіреді. Құжаттарды автоматты түрде тексеред", – деді цифрлық даму, инновациялар және аэроғарыш өнеркәсібі вице-министрі Дмитрий Мун.

Баяндамашыларды мұқият тыңдаған үкімет басшысы тауарды таңбалаудың маңыздылығы кәсіпкерлерге әлі күнге дұрыс түсіндірілмей отыр деп жауаптыларға шүйлікті. Өйткені бизнесмендердің "сертификаттау рәсімі ашық емес, кейбір құжаттарды қағаз түрінде қайта-қайта сұрайды" деген назы Олжас Бектеновке жеткен көрінеді. Сондықтан премьер-министр құзырлы органға жыл соңына дейін сауда саласындағы техникалық реттеу мәселесін шешуді жүктеді.

"Тауарларды цифрлық таңбалау жобасы ішкі нарықты контрафактілік және сапасыз өнімдерден қорғауға, отандық өндірушілердің бәсекеге қабілеттілігін арттыруға бағытталған. Меніңше, сауда министрлігі тарапынан таңбалаудың маңыздылығы мен оң әсері туралы кәсіпкерлерге тиісті түсіндіру жұмыстары жүргізілмеді. Сондықтан ақпараттық-түсіндіру науқанын күшейтіп, таңбалауға жататын тауарлар тізбесін кеңейтуді жалғастыру керек", – деді премьер-министр Олжас Бектенов.

Отырыста үкімет басшысы Олжас Бектенов құзырлы органдарға нақты тапсырмалар жүктеді. Биыл 1 қазанға дейін Сауда министрлігі мен Қаржы министрлігі бірыңғай ақпараттық жүйедегі тауарларды, жұмыстарды және көрсетілетін қызметтерді белгілі бір санаттарға бөліп, жүйелеу қажет. Одан кейін тауарлардың ұлттық тізімін жаңарту керек. Сондай-ақ Көкшетау мен Павлодарда азық-түлікті ваучермен беруді пилоттық режимде іске қосуға тиіс.

Аршат Әділжанқызы, Данияр Омар, Әлихан Өтеген, Астана

Мәтіннен қате тапсаңыз, бізге жазыңыз