Әмиянын жоғалтып көрген адам оның қайта оралуын көбіне кездей­соқтық деп ойлайды. Алайда психологтер бұл жерде адамның мейірімі мен эмоциясы үлкен рөл ойнайтынын дәлелдеді.

Осы жағдайға көз жеткізгісі келген шотландиялық ғалымдар Эдинбург көшелерінде қызық тәжірибе жүргізді. Олар 240 әмиянды әдейі «жоғалтып», иесіне қайтарылу ықтималдылығын зерттеді. Нәтижесі – таңғаларлық. Ішінде суреті жоқ әмияндардың бар-жоғы 15%-ы ғана иесіне оралған. Ал қарт жұптың суреті салынғандары – 28%, отбасылық суреті барлары – 48%, үй жануары бейнеленгендері – 53% қайтарылған. Бірақ нағыз рекордты сәби суреті орнатты. Мұндай әмияндардың 88%-ы иесін тапқан. Ғалымдардың пайымдауынша, сәби бейнесі адамдардың ерекше жанашырлық сезімін оятады. Жүрек елжіреген сәтте адам жоғалған затты иесіне қайтаруға бейім келеді.