Қазақстанда кім және қаншалықты скринингтен жиі өтуі тиіс?

Денсаулық сақтау министрлігі азаматтарға арналған скринингтен өту тәртібін жаңартты, деп хабарлайды Caravan.kz медиа порталы online.zakon.kz сайтына сілтеме жасап.

Елімізде скринингтік тексерулерден өту бойынша жаңа ереже бекітілді. Тиісті өзгерістер ҚР Денсаулық сақтау министрінің 2025 жылғы 22 шілдедегі №332-НҚ бұйрығымен енгізілді.

Енді 40, 42, 44, 46, 48, 50, 52, 54, 56, 58, 60, 62, 64, 66, 68, 70, 72, 74 және 76 жасқа толған ерлер мен әйелдер, егер олар артериялық гипертония, жүректің ишемиялық ауруы, қант диабеті, глаукома және мінез-құлықтық қауіп факторлары бойынша динамикалық бақылауда болмаса, екі жылда бір рет скринингтік тексеруден өтуге міндетті.

Сол жас санатындағы, сүт безінің қатерлі ісігі бойынша есепте тұрмайтын әйелдер де екі жылда бір рет тексеруден өтуі тиіс.

Бұдан бөлек, жатыр мойны қатерлі ісігі бойынша динамикалық бақылауда тұрмайтын 30, 34, 38, 42, 46, 50, 54, 58, 62, 66, 70 және 74 жастағы әйелдерге төрт жылда бір рет скринингтен өту ұсынылады.

50 жастан 76 жасқа дейінгі аралықтағы, цереброваскулярлық аурулар бойынша есепте тұрмайтын ер азаматтар үшін де екі жылда бір рет тексеруден өту міндетті болып белгіленді.

Сондай-ақ осы жастағы, тоқ ішектің қатерлі және қатерсіз ісіктері бойынша бақылауда тұрмайтын ерлер мен әйелдер де екі жылда бір рет скринингтік тексеруден өтуі қажет.

Декреттелген азаматтар санаты үшін бөлек ереже белгіленген. Бұл санаттағы адамдар В және С вирусты гепатиттерін ерте анықтауға арналған тексерулерден алты айда бір реттен жиі өтпеуі тиіс.

Қабылданған шаралар ауруларды ерте анықтауға және алдын алуға бағытталған. Бұл емдеудің тиімділігін арттырып, сырқаттанушылық деңгейін төмендетуге мүмкіндік береді.