Жетісу облысының полиция қызметкерлері үйінде фитозертхана ұйымдастырған күдіктіні ұстады, деп хабарлайды KAZ.NUR.KZ облыстық Полиция департаментінің баспасөз қызметіне сілтеме жасап.

"Қарасора-2025" республикалық жедел-алдын алу іс-шарасы аясында Жетісу облысы ПД Есірткі қылмыстарына қарсы іс-қимыл басқармасының қызметкерлері есірткі өткізу арнасын анықтады.

Жедел түрде бақылау ұйымдастырылып, нәтижесінде ішінде ерекше иісі бар, жасыл түсті өсімдік тектес заты бар зип-пакеттер салынған екі қаптама снек сатып алынды. Сот сараптамасының қорытындысына сәйкес, алынған зат — массасы 2,5 грамм болатын марихуана болып шықты.

"Күдікті — 36 жастағы Талдықорған қаласының тұрғыны екені анықталғаннан кейін оның тұрғылықты мекенжайында тінту жүргізілді.

Тергеу амалдары барысында төмендегідей заттар алынды:

• шыққан тегі белгісіз тұқымдар салынған 3 пластик және 4 полиэтилен қаптама; • қолдан жасалған шылым шегуге арналған құрылғы; • қоңыр түсті ұнтақ салынған зип-пакет; • тыңайтқыш құйылған 7 бөтелке; • сыртқы түрі қарасораға ұқсас өсімдігі бар 2 гүлсауыт.

Сараптама нәтижесінде алынған өсімдіктердің 18 граммы кептірілмеген қарасора, ал 34 граммы — кептірілген марихуана екені анықталды. Сондай-ақ іс материалдарында каннабис тектес басқа да туынды заттар тіркелген", — дейді ПД баспасөз қызметінің өкілдері.

Бұдан бөлек күдіктінің үйінде есірткі құрамындағы өсімдіктерді өсіруге арналған тыңайтқыштар мен арнайы жарықтандыру құралдарымен жабдықталған фитозертхана анықталды. Бұл жерде өсірілген өнім кейіннен тұтынушыларға өткізілген, оның ішінде азық-түлік өнімдері түрінде жасыру арқылы таратылған.

Аталған дерек бойынша сотқа дейінгі тергеп-тексеру амалдары жүргізілір жатыр. Күдікті қамауға алынды.

Полиция есірткі заттарын заңсыз сатып алу, сақтау, тасымалдау, өткізу мақсатында жөнелту немесе сату Қылмыстық кодекске сәйкес қылмыстық жауапкершілікке әкеп соғатынын ескертті. Мұндай әрекеттер үшін мүлкін тәркілей отырып, 5 жылдан 8 жылға дейінгі мерзімге бас бостандығынан айыру жазасы көзделген.

Мәтіннен қате тапсаңыз, бізге жазыңыз