Алматы облысының Балқаш ауданында қысқы мал азығын қамдауға бағытталған жұмыстар қарқынды жүріп жатыр.

Аудан аумағында жалпы көлемі 29 мың гектар суармалы егістік жер бар. Оның жартысына жуығына мал азықтық дақылдар егіледі. Бүгінгі күнге дейін 2560 гектар алқаптағы арпа мен бидай орылып, әр гектардан орта есеппен 18 центнерден өнім алынды. Жалпы өнім көлемі 3,4 мың тоннаға жетеді деген болжам бар. Сонымен қатар 6 мың гектардан астам көпжылдық шөп алқабында екінші орым аяқталды. Оның әр гектарға шаққандағы орташа өнімділігі 15 центнер. Жергілікті шаруалар бір ғана Балқаш ауданының өзін жыл сайын 90 мың тонна мал азығымен қамтамасыз етеді. Артылғанын өзге өңірлерге жөнелтеді.

Бүркіт Мұқанов, Балқаш аудандық Ауыл шаруашылығы бөлімінің басшысы:

- Ауданға керектісі өзі 90 мың тонна мал азығы керек. Біз оның өзін түгел толығымен жабамыз да, сосын Алматы облысының 70 процентін біз қамтамасыз етеміз осы мал азықтық дақылдармен. Мына Қарағанды, Жамбыл, Абай облыстары мен Астанаға дейін барады біздің шөптеріміз. Мына басқа райондардың бәрінде шөп күйіп кетеді. Бізде күймейді, сол бетте тұрады, бірқалыпты.