Мемлекет басшысы Алматы қаласының әкімі Дархан Сатыбалдыны қабылдады. Алматы әкімі президентке шаһардың әлеуметтік-экономикалық даму қорытындылары мен алдағы жоспарлары туралы баяндады, деп хабарлайды Ақорда.

Дархан Сатыбалды Қасым-Жомарт Тоқаевқа биылғы бірінші жартыжылдықта қысқамерзімді экономикалық индикатор 11 пайызға өскенін, негізгі капиталға салынған инвестиция көлемі 25,4 пайызға артқанын мәлімдеді. Сонымен бірге қаланың орталық бөлігіне түсетін жүктемені азайтуға, инфрақұрылымды теңгерімді бөлуге және қалада жайлы орта қалыптастыруға бағытталған полицентристік даму барысы жөнінде мәлімет берді. Ол аудандар арасындағы тиімді байланыс пен қоғамдық көлік қызметін жақсартатын транспорт жүйесін құру мәселесіне ерекше назар аударылғанына да тоқталды.

Бұл ретте Қасым-Жомарт Тоқаев шаһардың жоғарғы бөлігінде көппәтерлі тұрғын үйлер салуға және аумақты тарылтатын құрылыс жүргізуге мораторий енгізуді тапсырды. Бұл шектеу Бас жоспарда қарастырылған әлеуметтік нысандар мен туристік кластер жобаларына қатысты емес.

Бас жоспарға табиғи ортаны қорғауды күшейтуге, қаланы жүйелі дамытуға және тау бөктеріндегі құрылыстың алдын алуға арналған өзгерістерді уақыт оздырмай енгізу міндетін жүктеді.

Мәтіннен қате тапсаңыз, бізге жазыңыз