Тараз қаласының тұрғыны жалған құжат жасап, мемлекеттен заңсыз пәтер алған. Бұл туралы Жамбыл облысының прокуратурасы мәлімдеді, деп хабарлайды KAZ.NUR.KZ.

Қадағалау органының ресми сайтында хабарланғандай, Тараз қаласы әкімдігінің тұрғын үй қатынастары бөлімінде тұрғын үй заңнамасының сақталуына жүргізілген тексеру нәтижесінде азаматша "С" жалған анықтама ұсынып, өзін мемлекеттік қызметші ретінде көрсетіп, Тараз қаласындағы "Ұлы Дала" шағын ауданынан мемлекеттік тұрғын үй қорынан заңсыз екі бөлмелі пәтер алғаны анықталды.

Сот-сараптамалық зерттеуінің қорытындысына сәйкес ұсынылған анықтаманың жалған екені белгілі болды.

Прокуратураның нұсқауымен, 22.07.2025 жылы аталған алаяқтық фактісі бойынша Тараз қаласы ПБ-мен ҚК-нің 190-бабының 3-бөлігі бойынша сотқа дейінгі тергеп-тексеру басталды.

Қазіргі уақытта аталған жылжымайтын мүлікті мемлекеттік қорға қайтару жұмыстары жүргізіліп жатыр, ол кейіннен тұрғын үйге мұқтаж азаматтарға беріледі.

ҚПК-нің 201-бабына сәйкес өзге ақпарат жария етілмейді.

Мәтіннен қате тапсаңыз, бізге жазыңыз