Бұл туралы АШМ Агроөнеркәсіптік кешендегі мемлекеттік инспекция комитеті төрағасының орынбасары Саят Сақмолдин айтты.
Республика аумағында егістік алқаптарына, жайылымдар мен шабындықтарға шегірткеден зиян келген жоқ, деп жазады inbusiness.kz сайты.
"Биыл республика аумағында үйірлі шегіртке тектес зиянкестерге қарсы күрес шаралары 2,7 млн гектар алаңда жүргізіліп, бүгінде еліміздің барлық өңірінде өңдеу жұмыстары толығымен аяқталды. Бұл көрсеткіш өткен жылмен салыстырғанда 400 мың гектарға төмен", – деді Саят Сақмолдин Орталық коммуникациялар қызметіндегі брифингте.
Оның айтуынша, шегірткемен күрес шараларын уақытылы және сапалы жүргізу мақсатында аталған бағыттағы жұмыстарды үйлестіру үшін барлық өңірде облыс әкімінің өкімімен облыс әкімі орынбасарлары басқаратын жедел штабтар, әр аудан, қалаларда арнайы жұмыс топтары құрылды. Арнайы жол картасы әзірленді. Зерттеу жұмыстарына 4625 адам тартылды.
"Биыл өңдеу жұмыстарына 443 арнайы техника жұмылдырылды. Оның ішінде 239 жер үсті бүріккіш техника, 100 газогенератор, 24 жеңіл ұшақ, 31 аса жеңіл ұшақ және өзінің жоғары тиімділігін көрсеткен 49 агродрон бар, – деді комитет төрағасының орынбасары.
Саят Сақмолдин Ресей, Қырғызстан, Өзбекстан, Қытай мемлекеттерімен екі жақты келісімдер аясында шегіртке тектес зиянкестерге қарсы қорғау шараларын жүргізу бойынша бірлескен зерттеулер, онлайн-кеңестер және шегірткенің таралуы жөнінде ақпарат алмасу жүйелі түрде жүргізіліп отырды.
Биыл өңдеу шараларына биологиялық тиімділігі жоғары препараттар қолданылды. Сонымен қатар шегіртке мәселесі бойынша азаматтардың өтініштерін жедел қарастыру үшін арнайы колл-орталығы мен телеграмм-бот каналы құрылды.
"Жүргізілген шаралардың нәтижесінде ауыл шаруашылығы дақылдарының зақымдануына және шегірткелердің көршілес мемлекеттердің шекаралас аумақтарына қоныс аударуына немесе ұшып келуіне жол берілмеді. Республика аумағында егістік алқаптарына, жайылымдар мен шабындықтарға шегірткеден зиян келген жоқ. Биыл жылы шегіртке тектес зиянкестерге қарсы күрес науқаны сәтті аяқталды деп айтуға болады", – деді ҚР АШМ Агроөнеркәсіптік кешендегі мемлекеттік инспекция комитеті төрағасының орынбасары Саят Сақмолдин.
